LPS Pro Fight Title Fight-ah Rinawma a chak

02nd April 2019, 04:04PM

April ni 1, Thawhtanni tlai khan LPS Office-ah LPS Pro Fight Organising Committee an thu khawm a, a hnuaia mi ang hian thuchhuah a siam.

LPS Pro Fight 2019 Lightweigth Title Fight-ah champion lai Lalrinmawia (Govt Complex) chuan round 5 an inhnek hnuin Vanlalawmpuia (Khuangthing) lakah Split Decision (48-47, 46-49, 48-47) in hnehna a chang a. He result hi an sawisel zui hle a, chawpchilhin lungawi loten buaina an tichhuak hial a, Khuangthing Welfare Committee chuan ennawn leh turin ngenna lehkha an theh lut bawk a ni.

LPS Pro Fight Organising Committee chuan inhnek video ennawn tur leh buaina chhuah dan zir chiang turin member panga awmna Study Group a din a, kar khat chhung hun pek an ni. Anni hian an zir chian hnuah report an theh lut a, an report hi ngun taka ngaihtuah zui a ni.

Study Group report atangin mi thiam pasarih International Referee & Judge pakhat leh National Referee & Judge parukin inhnek video an ennawn a, an zinga pathum hi Study Group member, Mizo National Referee & Judge an ni a, a dang pali hi Mizoram pawn lam mi an ni.

Video atanga inhnek entu mi pasarih zinga pali chuan chak zawka puan tawh Lalrinawma an chaktir a, mi pathumin Vanlalawmpuia an tichak a ni. Video atanga inhnek entu mi pasarih hian round 4 leh 5-ah Vanlalawmpuia an chaktir vek a, round 1, 2 leh 3-ah mi paliin Lalrinawma an tichak ve thung.

Round 5 an inhnek chhungin a tawp round pahnihah Lalrinawma chak lo zawk viau mah se mi pali point pekah 48-47-in a chak a ni.

Study Group report atang hian Lightweight Title Fight hi inhnial theih tak a ni tih Organising Committee chuan a pawm a, official-a result lo puan tawh chu pawm theihah a ngai a ni.

Copyright © inkhel.com 2024. All rights reserved.