06 Mar 2019 01:36

inkhel

LPS Pro Fight Semifinal khelh zawh a ni

Yodha 4x4 Pickup LPS Pro Fight semifinal chu March ni 5, Thawhlehni zan khan R Dengthuama Indoor Stadium, Mualpuiah khelh zawh a ni a, inhnek vawi nga a awm. March ni 8, Zirtawpni zan dar 8:00-ah Final khelh tur a ni a, inhnek vawi ruk a awm ang.  

LIGHTFLY: Lallawmawma (Tuipui) bt Zorammuana (Tuipui) Unanimous Decision (49-47, 50-45, 50-45)

Lallawmawma'n thiamna tha tak lantirin Zorammuana a thunun a, round tinah langsarin unanimous decision-in a chak. A vawi khat nan final lutin Cherhlun boxer F Zoramchhana nen zirtawpni zanah an inhnek ang.

Tuipui rawlthar pahnih inkarah Lawma'n hnek dan chi hrang a hmang tamin a kut a rang. Vawi eng emaw zat hnek zawnin lehlamin a khing hneh lo va, judge pathumin 49-47, 50-45, 50-45 in an chaktir. A tir atanga a tawp thlengin Zorammuana'n khelh dan chi hrang hmang mang lovin kal khat takin a bei ve thung.

Kum 16 mi ve ve, SAI Centre, Mission Vengthlanga boxing zirlai ve ve, veikhawr ve ve an ni. An inhre chiang hle a, round hmasa berah Zorammuana'n vawi hnih te, vawi thum te a ngila a kut a chhuah zawn hmangin beiseiawm takin a khel.

Lawma'n rang takin lehlam taksa leh hmaiah a hnek zawn a, round hnihna atangin a nawr bet hneh. Tharumah a tha zawk a, inringtawk takin a pan a, rang takin kil hrang hrang atangin a hnek zawn. Inhnek tawnah a kut a rangin a dik zawk a, round thumna phei chu a awpbet viau a, vawi sarih hnek zawnin Zorammuana a inveng seng lo.

Round hnuhnung pahnihah pawh Lawma a chungnung zui zel a, Zorammuana'n a ngila vawi hnih a chhuah zawn bak khelh dan dang a nei tam lo. Lawma'n vawi li, vawi nga a hnek zawn fo va, lehlam invenna hnek tlangin nung takin a khel tluan a, phu takin a chak.

BANTAM: HC Lalramfela (Chawngtlai) bt Yuri Lalbiakdika Sanate (Vaitin) Unanimous Decision (50-45, 49-46, 48-47)

HC Lalramfela'n fiahna tling inhnek su tlangin hnek na leh dik zawk a nihna a chhawr a, unanimous decision-in bei ngawrh tak Yuri Lalbiakdika Sanate a hneh.

Vaitin fighter Biakdika'n hma a sawn tih a lantir a, a pantu zawkah tangin a hnek chhuak tam a, a tawp thlengin tlo takin a bei. Mahse, Chawngtlai chhuanvawr Ramfela'n thiamna leh tawn hriat a neih hmangin a dinhmun a siam a, judge pathumin 50-45, 49-46, 48-47 in an chaktir vek a ni.

Pro Fight hnuhnung ber 2017 khan final-ah an intawng tawh a, kum 23 mi Ramfela'n round nga a la fai vek. Tun tumah langsar khawpin a chungnung zo bik lo va, zirtawpniah fiahna hautak dang hmachhawnin Tuipui boxer Laldingliana nen final an khel ang.

Kum 22 mi Biakdika'n a tlawm tawhna chhan let ngei tumin a tir atangin a pan a, a ngilin a kut a chhuah zawn a, a vai zui bawk a, a tawp thlengin mar tha takin a khelh dan a pangngai. Ramfela'n hnek letin an inhnek tawn nasa a, hmuhnawm tham takin an inbei.

An inkara danglamna siam thei turin Ramfela'n hnek dan chi hrang a hmang tam a, a kutthlak a nat zawk bakah a rang a, lehlam invenna a hnek tlang fo. Taksa chet vel pahin a vai a, a ngilin a vei leh ding mar takin a chhuah a, inhnaihchilhah a dawm lut bawk.

Hnek chhuak reng mah se round hmasa pahnihah Biakdika'n a bet zawk a, round thumnaah erawh nawr hnehin a ngila a hnek fuh fo bakah a vai fuh bawk a, lehlamin a bei let zo lo. Mahse, round hnuhnung pahnihah Chawngtlai tlangval insiam thar lehin an inbei zui hle.

Manipur boxer KH Alexander Meitei hnehtu Vaitin fighter fei leh tlo tak laka a chak hnuin Ramfela'n GIG Motors Fighter of the Night lawmman a dawng a, a vawi hnih nan champion a tumna kawngah rahbi pawimawh tam a tuk.

LIGHT: Zomuansanga (Khatla South) bt Lalruatkima (Model Veng) Unanimous Decision (50-43, 50-43, 50-43)

Zomuansanga'n awlsam takin semifinal a paltlang a, round hmasa berah Lalruatkima'n vawi hnih chhiar a tawh hnuin hahdam takin a bei zui a, unanimous decision-in judge pathumin 50-43 vekin an chaktir.

Veikhawr Muantea hian chiang taka a vei lama a hnek fuh hmasak berah tawn hriat nei lo huang atanga tlang Ruatkima ke a phet nghal. Khatla South fighter-in um zuiin a ding leh veiin a hnek zawn a, Model Veng boxer chiaiin referee Suakchhinga'n a chhiar a, an inbei zui leh.

Kum 21 mi Muantea nawrin a vei lamin a hnek tlu a, chhiar a nih leh hnuah Ruatkima tho chhuak mah se a inveng nasa hle. Muantea'n um zuiin nuam ti takin a hnek a, a bekah vai zawnin a tlu leh. A tluk rualin round a tawp ve chiah a, referee tan chhiar hman a ni lo va, chuti ni lo se vawi thum chhiar ngaia a awm chuan chak lohtir tur a ni.

Round khatna thil thleng atangin engkim a chiang nghal a, kum 20 mi Ruatkima'n kawng engkimah a pha lo. Mahse, Muantea'n na takin a nawr zui lo va, inhnek hautak zawk hmachhawn leh mai tur a ni a, chumi atana inbuatsaihna ang chauhin a bei zui. Round tinah bet zawk vek mah se tlu nawn tawh lovin a tawp thlengin Ruatkima a ding tluan.

A vawi khat nan Muantea'n final a lut a, zirtawpniah Khuangthing fighter Vanlalawmpuia nen an innuai dawn a, Sete Boxing Academy pum chhuak ve ve an ni.

MIDDLE: H Lalrinhlua (Hnahthial) bt K Lalpianglawma (Sihtlangpui) Unanimous Decision (50-44, 50-44, 50-44)

Middle huanga a tel hmasak berah H Lalrinhlua'n Title Fight a khel dawn a, hnek fuh harsa tura tawlh kual tluan zak K Lalpianglawma lakah semifinal a paltlang a, round tin la vekin unanimous decision-in a chak.

Inven ringawta insawngbing Pianglawma hmaah Hnahthial tlangvalin fiahna tling inhnek hmachhawn lo mah se chak phu zawkin a inlan. A um tluan zak a, tum dang aiin hnek tlem viau mah se lehlam aiin a hnek chhuak tam zawk hle a ni.

Title Fight-ah champion lai Zarzoliana a inlan thei dawn lo va, weight dang angin middle-ah final a awm dawn lo. Kar leh thawhlehni zanah Hlua'n a vawi khat nan Title Fight a khel dawn a, kuttum hlauhawm C Lalduhawma nen kawnghren an inchuh ang.

Sihtlangpui boxer Pianglawma'n quarterfinal-ah inveng tluan zak chungin Lallawmkima Sailo a lehthal tawh a, Hlua hmaah chhunzawm leh tum mah se awmze nei khawpin a hnek let lo. A hnek chhuak mang lo va, tawlh kual rengin inven nan hun a khawhral a, inhnek a tihmuhnawm lo hle.

Kum 21 mi Hlua'n panin vawi hnih thum a hnek chhuah zawn rualin phui taka inveng Pianglawma a insaseng zel. An intawn changin a taksaah a hneksak nasa a, a lua hnek theih loh tura a kun nasat avangin round thumnaah kum 22 mi Pianglawma point paihsak a ni nghe nghe.

Inhnek fuh a tlemin ngam takah inbeih a awm lo bawk a, Pro Fight-a a tel vawi khatnaah tuar mang lovin Pianglawma a tla. Chutih rualin semifinal a lut a, rin kai zinga mi Lawmkima a hneh bawk nen hlawhtling takin championship a thlah liam.

LIGHTHEAVY: DK Munga (Hrianghmun) bt Vanlalchhuanga (Lunglei Venglai) Unanimous Decision (48-43, 48-43, 48-43)

Hrianghmun tlangval DK Munga'n a vawi khat nan Pro Fight-ah hnehna a chang a, tawn hriat nei lo Vanlalchhuanga lakah round tin lain unanimous decision-in a chak a, final a lut.

Pro Fight hnuhnung ber 2017 khan a vawi khat nan Munga telin a chak lo nghal. Beiseina sang zawk nen kir lehin amah aia kg 17-a rit Chhuanga hmaah thiamna nei zawk a ni tih a lantir a, zirtawpni zanah Chaltlang Lily Veng fighter Jack Lalsangliana nen an intawng ang.

Kum 30 mi Munga'n a kut chhuah zawnin a taksa leh bekah a hnek fuh fo va, nuai hneh zawk ni chungin chiai khawpin a nawr zo lo. Kg 92-a rit, kum 22 mi Chhuanga'n Pro Fight a khelh hmasak ber a ni a, tawn hriat hahthlak tak ni mah se round nga a khel tluan.

Round hnihna atangin boxer pahnih an tlahniam ve ve a, an inkuah nasat avangin vawi hnih an point paihsak ve ve an ni. A tawp lamah an hnek a zawi dun hle a, chungnung zawk Munga'n mittlung khawpin Lunglei Venglai tlangval lakah a khel zo bik lo va, hlimawm taka an inbeih chang a awm fo.

(adsbygoogle = window.adsbygoogle || []).push({});