Yodha 4x4 Pickup LPS Pro Fight quarterfinal chu March ni 1, Zirtawpni zan kha khelh zawh a ni a, GIG Motors Fighter of the Night-ah H Lalrinhlua (Hnahthial) chu thlan a ni. Semifinal hi March ni 4 Thawhtanni zan dar 8:00-ah khelh tan tur a ni a, inhnek vawi nga a awm ang.
March 1, Zirtawpni zan - bout 5 results
LIGHTFLY
Zorammuana (Tuipui) bt
F Lalmuanzuala (Sihphir)
= Unanimous Decision (50-45, 49-46, 49-46)
Tuipui rawlthar Zorammuana'n tha takin inhnek a thunun a, F Lalmuanzuala lakah quarterfinal paltlangin unanimous decision-in a chak. Zorammuana hian March 5-ah semifinal a khel dawn a, Tuipui boxer ve tho Lallawmawma nen an intawng dawn a ni.
Zorammuana'n panin inringtawk takin a khel a, a hnek a marin a tlang tha a, a hnek chhuak tam zawk hle bawk. Kum 26 mi Muanzuala'n fuh taka hnek chang nei mah se a inveng tam a, a hnek chhuak tam tawk lo va, lehlam hnek chhuah changin a hnek lettu zawk a ni a, a hlawhtlinpui lo.
Zorammuana'n chet vel a awlsamin hruihrual a hmang thiam zawk a, a tir atanga a tawp thleng ngam takin a khel. An inhnek a nung tawk lo va, inhnek zawn a tam lo viau bawk a, veikhawr ve ve niin ding vei chhuah zawn bak an inhnek zawn lo ve ve hle a, remchang dapin an inbei.
Sipphir boxer Muanzuala'n a vawi khat nan semifinal luh a tumna a puitlin zo lo va, 2009 leh 2014 khan quarterfinal-ah tho a tla tawh ve ve. Tuanah leh thiamna kawng hrang hrangah Tuipui boxer a pha lo deuh.
BANTAM
Yuri Lalbiakdika Sanate (Vaitin) bt W Alexander Meitei (Manipur)
= Unanimous Decision (48-47, 50-45, 48-47)
Yuri Lalbiakdika Sanate chuan fei leh ngawrh takin a bei a, Manipur boxer W Alexander Meitei lakah hnehna sual chhuakin unanimous decision-in a chak. Judge pahnihin round thumah chaktirin pakhatin inhnial theih takin round tinah a chaktir.
Vaitin beisei Biakdika hian a tir lamah harsatna a tawk a, India aiawha 2015 world junior championship khel tawh Alexander chuan tawlh pahin a vei lamin a vai fuh lo bakah a ngilin a kut karah a hnek lut tha thei hle.
Biakdika'n a pan a, hnek chhuak zawnin ngawrh takin a bei. Kum 20 mi Alexander chuan inhawng takin a lo hmachhawn a, chutih laiin che kual velin lehlam kuttum a bum a, dik tha takin hnek dan hrang hrangin a chhang let a, round hmasa pahnihah Vaitin boxer-in a tum angin a nuai thei lo.
Mahse, thahrui nei tha Biakdika'n mar leh tlo takin a tawp thlengin a nawr a, Manipur boxer a tlahniam ve thung. Round thumna atangin Vaitin tlangvalin langsar takin a hnek fuh fo va, mipui au thawm a tha hle. Vawi thum, vawi li vel hnek zawnin Alexander a inveng seng lo va, a hnek let hneh tawk lo bawk a, Biakdika'n a taksa leh hmaiah hneksak a awl apiangah a hnek a, inhnehtawk takin an innuai.
Kum 22 mi Biakdika hian a hmain Tuipui rawlthar Ramdinsanga a nuai hneh tawh a, round hmasa berah bet mah se ropui takin a kir leh. Alexander-a lakah hnehna chhinchhiahtlak chang lehin a hnek chhuak tam zawk hle a ni.
March 5-ah semifinal a khel dawn a, Pro Fight hnuhnung ber final-a a hneh loh Chawngtlai boxer HC Lalramfela nen an inbei dawn a ni.
LIGHT
Lalruatkima (Model Veng) bt Lalnunzawma (Bualpui NG)
= Unanimous Decision (48-46, 49-45, 49-45)
Lalruatkima'n a ngila a vei leh ding a hnek chhuah zawn thin hmangin Lalnunzawma lakah a dinhmun a siam a, unanimous decision-in a chak. Tawn hriat nei lo huang atanga semifinak lut Model Veng boxer hian March 5-ah Khatla South fighter Zomuansanga lakah fiahna a hmachhawn ang.
Ban sei zawk Ruatkima'n a ngila a vei leh ding a hnek zawn bakah thui taka a ding lam a chhuah thin a chhawr. Veikhawr Zawma'n rang leh dik takin a vei a chhuah fo va, mahse, inhnek tawnah Model Veng boxer kut a dik a, a nuai hneh zawk bawk.
Round thumna thlengin an inhnek tawk viau a, round hnuhnung pahnihah erawh chau ve vein an chet dan a fual a, an hnek zawi ve ve. A tir atanga bet hnem zawk Bualpui NG boxer Zawma'n inven nan kun a hmang hle a, round nganaah a point paihsak niin a tan beisei a bo leh zual.
Ruatkima'n round tin la vek lo mah se judge pahnihin round li an pe a, pakhatin round thumah a chaktir bawk. Tawn hriat nei lo huang atanga tlang ve bawk kum 18 mi Zawma'n a vei lam bak ralthuam a nei tam lo va, a thiamna a tawngchham deuh bawk.
MIDDLE
K Lalpianglawma (Sihtlangpui) bt Lallawmkima Sailo (Chaltlang Lily Veng)
= Split Decision (46-49, 48-47, 48-47)
Phui taka inveng chhungin K Lalpianglawma'n awmze neiin a hnek chhuak a, Lallawmkima Sailo a lehthal. Sihtlangpui boxer Pianglawma hian a hnek chhuak tlem zawk a, mahse, inveng hlawhtlingin split decision-in a chak a, Chaltlang Lily Veng fighter Lawmkima lamtang tan sawisel theih tak tur a ni.
Round nga an inbeih chhungin kum 25 mi Lawmkima'n a nawr tam hle a, hnek chhuak tam zawk a ni bawk. Mahse, harsatna lian tak nei tluanin hnek fuh langsar a nei mang lo. Pianglawma'n a ngila a vei lam a chhuah thut hmangin a hnek dak zauh zauh a, a ding lamin Lawmkima kut karah a hnek lut thin bawk.
Judge pahnihin 48-47 ve vein tawn hriat nei lo Pianglawma an chaktir a, judge pakhatin round liah rin hlawh zawk Lawmkima pe tamin 49-46 in Assam Regiment boxer a chaktir ve thung a ni.
An inbeih chhungin inhnek fuh chiang tak leh ngam taka inhnek tawn a tlem hle. Round hmasa berah Lawmkima'n a veh nasa a, awmze neia hnek a nei mang lo. Pianglawma'n a kuttum a chhuah tam zawk a, lehlam taksa leh hmaiah a hnek fuh. Round hnihna atangin Lawmkima'n a um ve thung a, vawi hnih thum hnek zawnin nuai viau a tum thin. Pianglawma a inveng phui tlat a, a tawp thlengin an khelh dan a danglam tawh lo.
Lawmkima'n a vai fuh tam lo va, a ngila a vei leh ding a chhuah zawn a hlawhtling tawk lo bawk a, lehlam phui taka a inven avangin a taksaah a hnek tel a, awmzia a nei thui chuang lo. Pianglawma a inveng nasain a tawlh kual tam a, a hnektu zawk Lawmkima inthlahdah laiin a hnek fuh leh zauh thin a, a kuah zui nghal vat zel.
Hriat hlawh lo Pianglawma tan hnehna ropui tak a nih laiin Lawmkima'n lungawi harsa a ti a, a rin loh danin middleweight title a beiseina a tawp. Pro Fight hnuhnung berah lightheavy Title Fight khelin champion lai HC Johnkenty Vanhlimpuia a hneh lo va, tunah semifinal lut pha lovin a tla.
H Lalrinhlua (Hnahthial) bt KH Sanamacha Singh (Manipur)
= Split Decision (48-47, 50-45, 47-48)
Dinhmun derthawnga a awm hnuah H Lalrinhlua'n chhel leh nung takin a bei let a, round hnuhnung pathumah KH Sanamacha Singh tawrhtirin split decision-in a chak hram a, a vawi khat nan Pro Fight champion nih a tumna kawngah fiahna hautak a paltlang.
Kum 21 mi Hlua hian a tir lamah harsatna a tawk a, round hnihna atanga a mitko vei lam a kak a, thisen chhuak hle mah se fei leh mar takin a khel tluan. Semifinal-ah rin hlawh zawk ni chungin K Lalpianglawma a hmachhawn dawn a, March 5-ah an intawng ang.
Kum 20 mi Sanamacha chuan round hmasa berah a nuai hneh hle a, a lu leh a taksaah hnek zawnin a hnuah tum hnih dawm dakin vawi thum chiang takin a hnek zawn. Round hnihnaah Hlua'n inveng takin a khel a, a vei leh ding a chhuah zawn bak a nawr tam lo va, a mitko kak atanga thisen chhuakin a tibuai deuh bawk.
2018 Manipur champion Sanamacha chuan inhnek tawnah a hnek hneh zui zel a, a ngila a ding lama a hnek leh a dawm chho thin hmangin Hlua a tawrhtir. Sa tha leh sek tak Sanamacha hi awmhmun chetah a thain a kutchhuak a hlauhawm a, mahse, round thumna atangin a tlahniam a, chet a harsatin a tuan a muang.
Ban sei zawk Hlua'n thahrui nei leh chet zung zung awlsam zawk a nihna chhawrin dik leh fuh takin a hnek. A tawp round thum chhungin Hnahthial tlangvalin nuam ti takin a bei a, a hnek tamin Sanamacha a hawi buai viau a, chak phuin theihna tha tak a lantir.
Lightheavy huanga title chuh tur zawnna final khel tawh Hlua hian middle title a chuh hmasak ber a ni a, Manipur boxer a hneh rualin GIG Motors Fighter of the Night lawmman a dawng. Jude pahnihin Hlua an chaktir a, pakhatin round zawng zawngah a dah sang erawh zawhna awm thei tak a ni.
Sanamacha a tlak rualin champion tuma feh chhuak Manipur boxer pahnih an tla ve ve. A hmain bantam-ah Yuri Lalbiakdika Sanate chuan W Alexander Meitei a hneh tawh a, semifinal lut pha lo ve vein Manipur boxer pahnihin Mizoramah zin kawng an zawh tawp.
Mar 4, Thawhtanni 8:00 PM semifinal Fixtures
LIGHTFLY
Heli Tana Tara (Arunachal Pradesh) v F Zoramchhana (Cherhlun)
BANTAM
Laldingliana (Tuipui) v Lalrinsanga Tlau (Khawruhlian)
LIGHT
Vanlalawmpuia (Khuangthing) v Zochhuanawma Fanai (Republic Veng)
MIDDLE
Abel Lalawmawia (Serchhip) v C Lalduhawma (Ramhlun South)
LIGHTHEAVY
Jack Lalsangliana (Chaltlang Lily Veng) v Hmingchungnunga (Zemabawk)
Mar 5, Thawhlehni 8:00PM semifinal Fixtures
LIGHTFLY
Lallawmawma (Tuipui) v Zorammuana (Tuipui)
BANTAM
HC Lalramfela (Chawngtlai) v Yuri Lalbiakdika Sanate (Vaitin)
LIGHT
Zomuansanga (Khatla South) v Lalruatkima (Model Veng)
MIDDLE
K Lalpianglawma (Sihtlangpui) v H Lalrinhlua (Hnahthial)
LIGHTHEAVY
DK Munga (Hrianghmun) v Vanlalchhuanga (Lunglei Venglai)