10 Mar 2019 09:01

inkhel

LPS Pro Fight final khelh a ni

Yodha 4x4 Pickup LPS Pro Fight final chu March ni 8, Zirtawpni zan khan R Dengthuama Indoor Stadium, Mualpuiah khelh a ni a,  Final a chak te hian March ni 12, Tjawhlehni zanah Titles Fight an hmachhawn leh ang.

March ni 11, Thawhtanni zing dar 8-9 chhungin Title Fight turte Hawla Indoor Stadium, Republic Vengthlangah an inbuk vek tur a ni. 

Final zan hian huntawi hman hmasak a ni a, Khuallian : Pu Lalruatkima, Minister of State, Govt of Mizoram chuan thusawiin "Ram changkang leh kang lo enna chu sports lamah an dinhmun a ni a. Olympic Games-ah ram hrang hrang inelin ram changkang apiangin hma an sawnin medal an la tam thin. Mizote infiamnaah hma kan la mek a, mipui thlawpna tha tak kan dawng bawk. Tuna kan thlen chinah duh tawk mai lova rei lo teah Olympian kan neih theih nan theihtawp chhuahin tan la zel ila. Kan thiamna leh theihna zawng zawng lan chhuahtir turin boxer-te duhsakna ka hlan. He boxing hmang hian kan ram hri vei, zu leh ruihhlo hi i knockout ang u." a ti. 

Mar 8, Zirtawpni zan - bout 6 results 

KT ENTERPRISE EXHIBITION FIGHT

(Sub-Junior)

C Ruatsangpuia (East Lungdar) bt Vanlalmalsawma (East Lungdar)

= Technical Knockout (Round 3, second 37)

East Lungdar naupang, kum 7 mi ve vein mipui an tihlim a, an chet vel danah an mikhual lo dunin tawngpawng inhnek a awm lo. C Ruatsangpuia a chungnung zawk a, round thumnaah Vanlalmalsawma hnar a hnek thisak a, inhnek tihtawp a ni.

East Lungdarah mi thahnem ngaiten sum thawh khawmin boxing coach an ruai a, mumal takin naupang an zirtir. An hmalakna hi Pro Fight Organising Committee chuan a ngaihlu a, naupang pahnih a chhawp chhuahsak. An beiseiawm dun viau a, naupang dang fuih phurtu pawh an nih ngei a rinawm.

Lalnunthari (Tuipui) bt Lalhruaitluangi (Venghnuai)

= Unanimous Decision (30-27, 30-27, 30-27)

Tuipui naupang Lalnunthari'n dik takin a vei leh ding a chhuah zawn thin bakah a chet vel danah Lalhruaitluangi aiin a sang hret a, round tin la vekin unanimous decision-in a chak.

Hmuhnawm tham takin kum 13 mi Nunthari leh kum 12 mi Hruaitluangi an inhnek a, thiamna chi hrang hmang tam lo mah se an hnek a mar thain a dik viau a, thleng sang thei tura beiseiawm tak an ni.

* KT Enterprise Exhibition Fight sub-junior inhnek pahnih hi round khat minute 1:30 niin round thum an khel a. A chak zawkin Rs 10,000 leh certificate, a chak lo zawkin Rs 5,000 leh certificate an dawng.

FINAL

LIGHTFLY

F Zoramchhana (Cherhlun) bt Lallawmawma (Tuipui)

= Unanimous Decision (49-46, 49-46, 49-46)

F Zoramchhana'n rang taka hnek zawnin fei takin a khel tluan a, Lallawmawma lakah unanimous decision-in a chak. Cherhlun chhuanvawr hian a vawi khat nan champion turin a zawnin vawi hnih Title Fight-ah a inlan ang.

Kum 19 mi Zotea'n round thumna atangin thahrui leh tawn hriat nei tha zawk a nihna a lantir a, tha taka inveng chungin lang thamin a hnek. Kum 16 mi Lawma'n final a vawi khat khelhna a ni a, a tir round hnih chhungin mar tha viau mah se a tlahniam.

Judge pathum point pekah 49-46, 49-46, 49-46 in Zotea a chak. A hmain inhnial theih takin Arunachal Pradesh boxer Heli Tana Tara a hneh tawh bawk a, championship kal mekah champion lai tel lovin GIG Motors Best Boxer a ni a, Rs 5,000 leh trophy dawngin Cherhlun chhuanvawr tan mi mala hlawhtlinna chhinchhiahtlak tak a tling.

2017 khan a vawi khat nan Zotea'n Title Fight a khel a, champion lai NT Lalbiakkima a hneh lo. Tuipui rawlthar Lawma a hneh rualin a tlawm tawhna chhang let turin Siaha fighter nen an intawng leh dawn. Zotea a chak hnu lawkah mipui zing atangin hruihrual chhungah Biakkima a lut a, Cherhlun tlangval nen an indinchilh nghe nghe a ni.

Round hmasa pahnihah an inhnek tawk hle a, Zotea'n panin a ngila a vei a chhuah hnuah a ding lam a vai nghal a, tha takin a inveng tel. Veikhawr Lawma'n a ding leh vei a chhuah zawn bakah rang takin a hnek zawn fo va, nung takin a khel.

Round thumna laihawl atangin Zotea kut a langsar a, Lawma'n a hnek chhuak tlem a, a tlan kual tam. Round hnuhnung lamah Cherhlun fighter-in vawi li atanga vawi riat thlengin rang tak takin a hnek zawn a, Tuipui rawltharin a chhang let zo lo va, bet leh inveng zawkah tangin hun tawp a hmang.

BANTAM

Laldingliana (Tuipui) bt HC Lalramfela (Chawngtlai)

= Unanimous Decision (49-46, 49-46, 48-47)

A vawi khat nan champion a tumna kawngah Laldingliana'n rahbi lian tak a tuk a, 2015 champion HC Lalramfela lakah unanimous decision-in a chak a, a vawi khat nan Title Fight-ah a inlan ang.

Phui taka inveng chunga remchanga hnek chhuak thin Dingliana aiin lehlam a inveng nasa. Kum 23 mi Ramfela tawn hriat nei tha viau mah se tum danga a khelh dan a pha hle lo a, a hnek chhuak tlemin a vai thelh nasa a, a theihna lantir tura ngam taka a beih loh avangin a ruahmanna a fuh lo.

Taksa chet vel nena inveng thiam zawk kum 20 mi Dingliana buaina tur khawpin Chawngtlai boxer-in a nawr zo lo. Fimkhur tak ve vein an inbei a, inhnek fuh a tlem a, hetianga inkhelh thiam leh hnek dik zawk Tuipui tlangvalin 49-46, 49-46, 48-47 in hnehna a chang.

2014 khan kum 15 mi niin a vawi khat nan Pro Fight-ah Dingliana a tel a, lightfly-ah final lutin a chak zo lo. Bantam-a a khelh hnuah rahbi thar a tuk a, Title Fight-ah Ramfela'n vawi hnih a hneh loh zawn tawh Dinthar boxer Zonuntluanga a hmachhawn dawn.

Ramfela'n title lak kir a tumna a puitlin zo lo. Dingliana hmaah inveng takin a khel a, round hmasa pahnihah hnek fuh nei zauh zauh mah se a tawp round thumah a hnek chhuak tam lo va, a hnek chhuah chhunah a vai thlawn hnemin awmzia a nei zo lo.

Dingliana'n a hman thiam a vei leh ding rang taka a chhuah zawn thin bakah a taksaah a hnek fo. Hnek chhuah a awlsam zawk a, taksa chet vel pahin awmze neiin a vai a, a pumpuiah hnek chuak tam zawkin lehlam kut karah a dawm lut fo bawk.

Ramfela'n hriat hlawh lo takin 2015 khan champion lai Lalnunhlua hnehin title a la. 2016-ah Tetea lakah a hloh a, 2017-ah Tetea nen bawk Title Fight-ah intawng lehin a tlawm nawn. Hmasawn tumin bei mah se kum li kal ta kha a tawn san lai ber niin vawi thum Title Fight-a a inlan zawn hnuin tunah thleng pha lovin a tla.

(adsbygoogle = window.adsbygoogle || []).push({});