November ni 11, 2021 (Ningani) khan office chamber, MINECO, Aizawlah Sports Minister Pu Robert Romawia Royte chuan Mizo boxer-te chak vek tura duhsakna hlan chungin LPS Fight Night 2 a khuh hawng. November 27, 2021 (Inrinni) zanah Dawrpui Multipurpose Hall, Aizawl-ah LPS Fight Night 2 buatsaih a ni dawn a, NT Lalbiakkima'n a vawi khat nan Mizoram leilungah professional boxing a khel dawn. LPS Fight Night 2-ah International Boxing Association (IBA) inter-continental title humhim tumin weight zang berah amah aia tawn hriat ngah kum 23 mi Gerttipong Kumsahwat nen an inhnek ang.
NT Lalbiakkima chuan LPS Fight Night 2 atana a inbuatsaih nasat thu leh a fitness a that tawk thu a sawi a, Round 10 inhnek tur ni mahse Round 5-na ah kingpui tur Gerttipong Kumsahwat hi a hnek tluk theih a rin thu a sawi tel bawk. LPS Fight Night 2-ah hian bout 7 awm tura tih a ni. Mizo boxer dang paruk an inlan dawn bawk a, Indian boxer vek an hmachhawn ang. Vanlalawmpuia (Khuangthing), Laldingliana (Tuipui), F Zoramchhana (Cherhlun), C Lalhruaitluanga (Mualpui) leh HC Lalramfela (Chawngtlai) bakah, Hnahthial boxer H Lalrinhlua'n a vawi khat nan professional boxing a khel dawn a ni.
LPS Vision-in LPS Fight Night 2 senso zawng zawng a tum ang. Rampawn atangin boxer leh mi pawimawh 20 chuang lo kal tura beisei an ni a, Mizorama an chamchhung an thlenna senso, an hlawh hi an tumsak vek dawn a ni. LPS Boxing promotion chuan Kumsahwat-a hlawh atan $1500 a pe dawn a, hetiang zat chiah hi Champion lai NT Lalbiakkima'n a hlawh bawk ang. Main Event nilo zawng hian an chak chuan Rs 30,000/- an hlawh ang a, an chak loh chuan Rs 20,000/- an hlawh thung ang.
Covid-19 leng avangin mipui nawlpui hnenah inhnek enna ticket hralh chhuah a ni dawn lo. A hmuna lut thei tur bithliah chin siam fel a ni ang a, LPS Fight Night 2 hi television kal tlangin zau zawka pek chhuah zui zel tum a ni bawk Pay-per-view a en turin buaitsaih a ni leh dawn a, Rs 100/- in a en theih dawn a ni. Pay-per-view atanga sum lut 85% hi Boxer te hian an dawng ang a, a bak zawng 15% hi Chhimbal Apps, a buaipuina senso ah pek a ni ang. LPS Pawt tu te tan Rs 60/- pek belh in a en theih dawn bawk a ni.
MAIN EVENT - MINIMUMWEIGHT IBA INTERCONTINENTAL CHAMPIONSHIP
Nutlai Lalbiakkima (India) - 2 win, 0 loss, 0 draw
Gerttipong Kumsahwat (Thailand) - 6 win, 9 loss, 0 draw
(Kumsahwat hian nikumah flyweight huangah WBO Asia Pacific Championship a chuh tawh a, hnuhma a neih that tawk lohna chhan chu minimumweight chung flyweight-ah amah aia lian a bei fo va, chak loh a ngah phah.)
UNDERCARD FEATHERWEIGHT
Laldingliana (Mizoram) - 1 win, 0 loss, 0 draw
Rohit Mehra (Haryana) - 2 win, 1 loss, 0 draw
SUPER LIGHTWEIGHT
Vanlalawmpuia (Mizoram) - 2 win, 0 loss, 1 draw
Suresh Pasham (Hyderabad) - 2 win, 1 loss, 0 draw
SUPER BANTAMWEIGHT
F Zoramchhana (Mizoram) - 2 win, 0 loss, 0 draw
Sandeep Singh Bhatti (Punjab) - 4 win, 2 loss, 0 draw
SUPER WELTERWEIGHT
C Lalhruaitluanga (Mizoram) - 1 win, 0 loss, 0 draw Kamal Kant (Rajasthan) - 4 win, 0 loss, 1 draw LIGHTWEIGHT HC Lalramfela (Mizoram) - 1 win, 0 loss, 0 draw Parash Chauhan (Gujarat) - 0 win, 0 loss, 1 draw SUPER MIDDLEWEIGHT H Lalrinhlua (Mizoram) - debut Subin Augustine (Hyderabad) - 1 win, 0 loss, 0 draw