November ni 24, 2021(Nilaini) khan, Hotel Regency bunker, Zarkawt-ah LPS Fight Night 2 inbuatsaihna kal zelah Mizo Boxer te belhchianna hun hman a ni. Pu Lalsawmliana Pachuau, Chairman, Organising Committee chuan kaihruaiin a duh apiang tan zawhna leh chhanna hun hman a ni.
LPS Fight Night 2 hi November ni 27, 2021(Inrinni) zan dar 8:00PM-ah Dawrpui Multipurpose Centre, Aizawl-ah neih a ni ang. LPS Fight Night en turin Zoram chhung leh khawvel puma Mizo zawng zawng sawm kan ni. LPS Vision pawttute hnenah Cable PPV Home unit khat Rs 60-a hralh chhuah tur a ni. Sponsor leh PPV-in senso a daih lo a nih chuan LPS in a tum vek ang.
Khawvel huapin, a duh apiang en theih turin Chhimbal App-ah PPV hmanga pek chhuah a ni dawn a, Rs 100 a hralh tur a ni ang. Heta tanga sum hmuh 85% hi Mizo boxer pasarihin an insem ang a, a bak 15% chu Chhimbal App-in an chang ang. Entum te chuan arang lama tihfel tur a ni.
IBA Intercontinental title fight Champion lai NT Lalbiakkima'n Thai boxer Gerrtipong Kumsahwat hmachhawnin title humhim a tum dawn a, round 10 inhnek tur a ni a, NT Lalbiakkima chuan round 5 an khelh hma ngei a hnek tluk theih a rin thu a sawi.
Mizo boxer dang paruk Laldingliana, Vanlalawmpuia, F.Zoramchhana, C.Lalhruaitluanga leh HC. Lalramfela bakah, a vawi khat nan H Lalrinhlua'n professional boxing a khel dawn. Anni hian Mizoram pawna Indian boxer an bitum theuh dawn a ni.
Mizo boxer te
FEATHERWEIGHT
Laldingliana (Mizoram) vs Rohit Mehra (Haryana)
SUPER LIGHTWEIGHT
Vanlalawmpuia (Mizoram) vs Suresh Pasham (Hyderabad)
SUPER BANTAMWEIGHT
F. Zoramchhana (Mizoram) vs Sandeep Singh Bhatti (Punjab)
SUPER WELTERWEIGHT
C. Lalhruaitluanga (Mizoram) vs Kamal Kant (Rajasthan)
LIGHTWEIGHT
HC. Lalramfela (Mizoram) vs Parash Chauhan (Gujarat)
SUPER MIDDLEWEIGHT
H. Lalrinhlua (Mizoram) vs Subin Augustine (Hyderabad)
LPS Boxing Promotions chuan Kumsahwat-a hlawh atan dollar 1,500 a pe dawn a, hetiang zat chiah hi champion lai NT Lalbiakkima'n a hlawh ang. Mizo boxer pasarihin an inhnek atanga hlawh an neih theuh dawn bakah pay-per-view (PPV) atangin chanvo an nei tel dawn a, PPV hralh chhuah tam dan azirin an sum lak luh a tam mai dawn a ni.