18 Oct 2020 02:17

bakteaJr.

Mizo tlangval

​London club lian ber pahnih an chak zo lo ve ve

Chelsea chuan Inrinni zan Premier League inkhelah Southampton chu Stamford Bridge-ah an lo mikhuala, team hnihte hi 3-3 in an inhnehtawk.

Chelsea tan hian Timo Werner chuan goal hnih a khunga, Kai Havertz chuan goal khat khung bawkin, Southampton tan hian Danny Ings, Che Adams leh Theo Walcott te chuan goal an khung ve bawk.

Khelh ngaah Chelsea hian point 8 an hlawhchhuak tawha, paruknaah awm mekin, Southampton hian khelh ngaah point 7 hlawhchhuak tawhin, 11-naah an awm mek thung.

Chelsea hian bul an tan tha hlea, first half-ah an khel a hmuhnawmin, an goal bawh pawh na hle mahse, an tlar hnung lamah buaina an la tawk chhunzawm zela, an chak zawh loh chhan ber ni pawhin a lang.

15mins khelh a nihin Werner hian goal a khunga, Ben Chilwell hnen atanga a ball hmuh chu defender paliin chuh buai tum mahse goal-ah a chan tira, Chelsea tana a Premier League goal hmasa ber a khung.

Darkar chanve khelh a nih hma hretin Werner bawk hian goal a khung leha, Jorginho pass tha tak chu Werner hian lo lain, goalkeeper a pet khum hnuah, defender pahnih inkar atangin goal-ah ball a tauh luta, 2-0 in Chelsea hma a hruaipui.

Half time hma deuh lawkin, Havertz chuan ho takin ball a hloha, hei hi Saints lamin hmang tangkai nghalin, Ings chuan goal a khung zuia, 2-1 in first half a tawp.

Second half-ah Chelsea khel a hmuhnawm loh chho deuha, first half-a an khel a tluk lo hle. Darkar khat khelh a nih dawnah Saints lamin an si phurh an suta, Zouma chuan an keeper Kepa pass tumin ball a pe a, Zouma hian a pe na lo hle. Kepa a rawn tlan chhuaka, Adams nen ball lak hmasak inchuh mahse Adams hian a la ta zawka, Adams hian goal-ah khung zuiin, 2-2 a ni.

Chelsea lamin hma an hruai leh nghala , Werner-a’n mahni hma sial lo taka a pass chu Havertz chuan goal-ah a lo chan tirin 3-2 a ni. Chelsea hian nuamsa takin hnehna an chang dawn emaw tih hnuah goal an chhuah ta nuala, an tihsual vang a ni deuh vek bawk.

Hun tawp dan injury time-ah Saints lamin goal an khunga, Ryan Bertrand-a’n free kick atanga a ball vawrh luh tha zet chu Walcott-a tan tla remin, Walcott-ah hian a pet-a Vestergaard chuan lo tauhin goal-ah a lut a, 3-3 in inkhel tihtawp niin, team hnihten point khat ve ve an hlawhchhuak ta a ni.

Chelsea 3-3 Southampton

(Werner 15’, 28’, Havertz 59’) (Ings 43’, Adams 57’, Vestergaard 90+2’)

Player Ratings

Chelsea: Kepa 3, Azpilicueta 5, Christensen 4, Zouma 4, Chilwell 6, Kante 5, Jorginho 7, Mount 7, Havertz 8, Pulisic 6, Werner 9. Subs: Ziyech n/a, James n/a, Abraham n/a.

Southampton: McCarthy 5, Walker-Peters 4, Vestegaard 7, Bednarek 3, Bertrand 4, Romeu 5, Ward-Prowse 7, Redmond 6, Adams 8, Walcott 7, Ings 8. Subs: Tella n/a, Diallo n/a, Long n/a.

Inrinni zan Premier League inkhelah, Manchester City chuan Etihad Stadium-ah Arsenal an lo mikhuala, mual neitu zawk City hi Raheem Sterling-a goal khat hmangin, si khat faiin Gunners hi an lo hneha, point 3 an hlawhchhuak.

City hian khelh liah point 7 hlawhchhuak tawhin, 10-naah an awm meka, Arsenal hian khelh 5-ah point 9 hlawhchhuak tawhin, pangnaah an awm mek thung a ni.

Arsenal hian City hi an hneh lo hle a, a bikin first half-ah City an chungnung hle. 20mins chuang hret khelh a nihin City hian goal an khunga, Phil Foden-a shot chu Leno chuan lo save perin, Sterling chuan goal-ah a lo khung zuia, City in hma an hruai.

Arsenal lam pawh chance nei lo an ni hauh lova, half time hma lawkin Saka chance neih chu Ederson chuan tha em emin a lo save. Inkhelah chance hlauhawm tak sawi tur a tam lova, ball an inchan hnem hleih em avangin, a hmuhnawm tur angin inkhel pawh a hmuhnawm lo a tih theih awm e.

Manchester City 1-0 Arsenal

(Sterling 23’)

Player Ratings

Man City: Ederson 8, Walker 7, Dias 8, Ake 8, Cancelo 7, Rodri 7, Foden 6, Silva 6, Mahrez 7, Aguero 7, Sterling 8. Subs: Gundogan 6, Fernandinho n/a.

Arsenal: Leno 7, Luiz 7, Gabriel Magalhaes 7, Tierney 7, Bellerin 7, Ceballos 6, Xhaka 7, Saka 7, Willian 7, Aubameyang 6, Pepe 6. Subs: Lacazette 6, Partey n/a, Nketiah n/a.