Youtuber lar tak Logan Paul chuan UFC Featherweight leh Lightweight champion hlui Conor Mcgregor chu octagon chhunga insual puiah a cho.

Paul hi Youtuber dang KSI nen nikum August thla khan amateur boxing match-ah an lo intum tawha, he bout-ah hian chak zawk awm lovin majority draw-a kal tir a ni.

Kumin September ni li khan Paul leh KSI-te hi an inhnek nawn leh tur thu hi puan a ni a, tun tumah erawh amateur ni tawh lovin professional boxing match a ni tawh dawn a, kumin November ni 9-ah Staples Center-a neih a ni ang.

Paul hi a professional boxing debut atan a inbuatsaih meka, KSI nen rematch an neih zawhah, Octagon chhungah Irish fighter lar Conor Mcgregor a sual hreh loh thu a sawi.

Mcgregor hi kum upa lam tawh tak pub pakhata a hnek lai video a lar chiama, amah tantu tam tak pawhin an tan lo phah nghe nghe a, Mcgregor hian vantlang hriatah thupha a chawi tawh bawk.

Logan Paul chuan, “Conor hi ka sual hreh lo, putar a hmaiah a hneka, a zahthlak hle. Mahse putar khan a hnek kha a dawl em em a, Conor-a’n a hnek zawh khan a zu in lai kha a in zo mai. MMA hi ka ngaina a, KSI nen kan inhnek zawh hian MMA lama luh ka duh, high school ka kal lai khan wrestling ka khel thin a, ka hreh lem lo a ni,” a ti.