11 Sep 2019 12:12

bakteaJr.

Mizo tlangval

​Lo Celso a inhliam

Tottenham midfielder thar Giovani Lo Celso chuan a kawng a tihnat avangin hun eng emaw chen a inkhel thei dawn lo tih Tottenham chuan an puang.

Argentine playmaker Lo Celso hi a kawng na avang hian thla hnih dawn a inkhel thei dawn lova, October thla tawp lamah khelmual chhung a luh leh theih chauh a rinawm.

Tottenham chuan tun nipui chhung khan Lo Celso hi Real Betis atangin loan-in an laluta, nakkum lamah an duh chuanpound maktaduai 55 sengin an lalut thei dawn. Lo Celso hi a ram Argentina tana a fehchhuah naah inhliamin, inenkawl turin Tottenham lamah a kir leh.

A tirah Lo Celso hi a inhliam na vak lo angin lang mahse thla ruk emaw thla riat ve tal a chawlh a ngai dawna, Tottenham tan a la khel tak tak theih dawn rih lo.

Kum 23 mi hian league game eng emaw zat a khel thei dawn lova, Premier League-a Crystal Palace, Leicester City, Southampton, Brighton leh Watford an hmachhawn hunah a inlan ve thei dawn lova, mahse October ni 27-a Liverpool an hmachhawn hunah erawh khel thei tawh tura beisei a ni.

Lo Celso hian an Champions League game hmasa pahnih a khel thei dawn lo bawka, an game thumna pawh a khel thei dawn em a la hriat loh. Tottenham hi Olympiacos, Bayern Munich leh Red Star Belgrade-te nen Champions League group khatah an awm a ni.