21 Aug 2019 10:32

bakteaJr.

Mizo tlangval

​Lloris-a’n Spurs hmasawn ngaihna lai awmchhun a sawi

Tottenham captain Hugo Lloris chuan Premier League title la thei tur zinga an tel duh a nih chuan hmasawnna lai tur pakhat an la neiin a hria.

Tottenham hian season liamta khan Manchester City leh Liverpool-te chu an hnaih ber renga, an um char char hnuah season chawhnu lamah an che chhe chhova, a tawpah phei chuan palinaah an awm.

Season liamta khan Tottenham hian February thla laihawl khan Premier League champion Manchester City chu point nga chiahin pha lo mahse season a zawh meuh chuan point 27 laiin an pha lova, insiamthat an la ngai hle.

Season hmasa tluan khan Tottenham hian an tumpuite chu vawi hnih chiah an inhnehtawkpuia, City nen an tumpuite inhnehtawkpui nei tlem ber an ni. Vawi hnih an tumpuite an inhnehtawkpui bakah vawi kua lai an tlawma, Lloris chuan chak loh mai aiin an tumpuite inhnehtawkpui hram an mamawh thu a sawi.

Lloris chuan, “Tun season-a hmasawn kan ngaihna lai awmchhun chu, kan chak thei lo a nih pawhin tlawm loh kan zir a ngai a, Manchester City ang lakah ngat phei chuan point hlawhchhuah ngei ngei kan mamawh a ni.

“League-a team tha ber berte kan elpuia kan inum pui duh a nih chuan chak lo mai lova, kan tumpuite inhnehtawk pui hram hram hi kan mamawh hle a ni,” a ti.