Tottenham goalkeeper leh captain ni bawk Hugo Lloris chuan an game hnuhnung bera a team-mate Heung min Son nen half time-a an intihbuai chhan a sawi.

Tottenham hian Everton hi 1-0 in an hneha, half-time-ah Lloris leh Son hi intibuai mahse second half tan dawnah chuan an inkar a tha leh tawh tih a hmuh theih.

Lloris chuan Sky Sports a hrilh danin, “Heng thil hi chu sawi chhuah vak lova, dressing-room lama chinfel chi a ni a, pawnlamah hi chuan in duh duh in sawi a thiang. Dressing-room ah hian player tin te inkarah hian inzah tawnna a awm.

“Sonny nena kan inkara thil thleng kha chu a chang chuan football-a thil thleng ve thin reng a ni a, tunah chuan buaina eng mah a awm tawh lo. Inkhel zawhah pawh khan he team-a awm kan nih anga kan hlim zia a hmuh theih a, point 3 kan hlawhchhuak thei kha kan lawm hle. 

"Half time hma lawk khan lehlamin chance an rawn nei a, kha kha a chhan chu kan press tawk loh vang a ni a, kha kha min ti lungawi lo ngei alawm. Mahse heng hi chu football-in a ken tel a ni, theihnghilh leh mai tur a ni,” a ti.