​Lloris-a’n Pogba a chhan

18th October 2018, 03:10PM

France leh Tottenham captain Hugo Lloris chuan France leh Manchester United midfielder Paul Pogba thlavang hauhin, mite sawisel ang em em a khel chhia a nih loh thu a sawi.

Manchester United-in a lakluh laia khawvela footballer manto ber Pogba hi tunlaia chanchin ngah berte zinga mi a ni a, a khel tha lova sawiseltu pawh an tam hle. France tan kumin World Cup-ah ropui takin khel mahse season tan hnuah club tan a khel tha lo.

Kum 2016 khan United hian Pogba hi Juventus atangin pound maktaduai 89 lai sengin an lalut a, mahse Pogba-a khelhdan hi a man nen a in phu lo rih hle niin pundit tam takin an sawi. France captain Loris chuan France tana a khelhpui Pogba chu chhanin miten an tehdan chu a rualkhai loh thu a sawi.

Lloris chuan, “Pogba hian England-ah huhang a ngah em em a, a man to lutuk vang ni berin a lang. Miten an tehdan hi midang an tehdan nen a inang lo em em a, tunah chuan a puitling chho tawh a, a tih theih a hre chianga, France tan chu chu a lantir tawh bawk. Mite sawi ang em em hian Pogba hi United tan a khel chhe hran lova, United hi tun hnaiah kan beisei aiin an khel chhia a, chumi team-ah chuan Pogba hi a tel ve mai a ni,” a ti.

United hian season bul an tan chhe hle a, kum 29 hnua season bul an tan chhiat ber a ni nghe nghe. An chet chhiat chhanah hian mawhphurtu ber hriat a har a, mimala puh tur ni pawhin a lang lo. A thenin United chief executive Ed Woodward an puh a, a thenin manager Jose Mourinho an puh laiin a thenin player-te an puh ve mek bawk.

Player zingah hian Pogba hian sawisel a hlawh zual bik a tih theih a, sawisel hlawh leh langsar bik a ni lo thei lo. A man a to va, a lakah beisei a sang lo thei lova, kumin World Cup-ah France tana a khelh ropui ang aiin United tan hian a khel tha lova, United player-te zingah sawi pawh a hlawh ber reng a ni.

Copyright © inkhel.com 2024. All rights reserved.