Tottenham captain Hugo Lloris chuan tun nipui bazar lo awm turah hian Tottenham chhuahsan mai a hnial lo tih a sawi a, Lloris hi a club hlui Nice nena sawizawm nghal a ni bawk.

Lloris hian season khat dang daih North London club-ah hian contract a la nei a, mahse a contract a hman zawh hmain a chhuak lovang tih a sawi theih lova, season tharah a career bul tanna Nice-ah a kir maithei.

French chanchinbu Nice-Matin in an kawmnaah Lloris chuan, “Club tan a ni emaw, ka tan a ni emaw, tun hi hun pawimawh a ni a, era a tawp hun a ni. Hmun danga kal chakna ka nei a, ka kal theihna tur te ngun takin ka zir chiang ang.

“Chutih rual chuan Tottenham-ah kum khat daih contract ka la nei tih hi ka theihnghilh lova, football-ah chuan thil thleng tur sawi lawk a harsa. Tuna pawimawh ber chu ka tana tha tur project awmna lama kal a ni,” tiin a sawi.

French goalkeeper hian season a hmang tha lova, season tawp lamah vanduai zuiin, May thla khan a inhliama, a tum aia hmain a season a tawpa, Tottenham tan si ban a nghah leh a rinawm tawh loh hle.

Spurs hian kum 36 mi hi kum 2012 khan French club Lyon atangin an lei a, a manah euro maktaduai 15 vel an seng. Lloris hian Spurs tan game 447 khel tawhin, Tottenham player ropui zinga chhiar a ni reng tawh dawn a ni.