03 Dec 2019 03:57

inkhel

Ljungberg hian thil ropui min tihpui ang: Aubameyang

Pierre-Emerick Aubameyang chuan Freddie Ljungberg lakah beiseina a neih san thu sawiin, a kaihhruaina hnuaiah eng emaw thil ropui tak an tih theih a rin thu a sawi.

Arsenal chuan manager Unai Emery an ban a, a hmun ruak luah tur hian Gunners winger hlui Freddie Ljungberg chu an ruat lailawk a. Pathianniah khan Ljungberg kaihhruaina hnuaia an khelh hmasak berah Arsenal leh Norwich City te chu 2-2 in an inhnehtawk a ni.

Norwich City nen an inkhelh tum hian Arsenal captain Pierre-Emerick Aubameyang chuan goal hnih a thun a, Carrow Road-ah point 1 chu hlawh chhuak thei mah se inelna hrang hrangah match 8 chhung chu Arsenal hian chak hmel an hmu tawh lo a ni.

Tun hnaiah che tha loin, Freddie Ljungberg kaihhruaina hnuaiah chak nghal lo mah se Pierre-Emerick Aubameyang chuan an head coach thar zarah dinhmun tha zawka an din chhoh theih a rin thu a sawi chhuak.

Aubameyang chuan, “Freddie Ljungberg hi Invincibles ah khan a tel ve a, a kaihhruaina hnuaiah hian thil ropui tak chu kan tih theih ngei ka ring,” a ti.

“A vanglai khan he club tan hian thil ropui tak a lo ti tawh thin a, a hnung hi kan zui ang a, a tan hian theihtawp kan chhuah ve dawn a. Tu te pawhin Freddie hi kan zahin kan ngaisang a. Arsenal tana lo khel tawh thin a ni a, hei vang hian player te rilru put dan tur pawh a hre chiang hle dawn a ni,” a ti bawk.

A sawi zelnaah, “Kan hnena a awm thei hi a lawmawm ka ti hle a. A kaihhruaina hnuaiah vawi khat chiah training hi kan la nei a tih theih a, tun kar chhoah hian eng thil nge thleng dawn tih chu kan la hre chho zel ang,” a ti.

“A mi mal tak pawhin kei chuan Freddie hi kan tan a that ka ring hle a. Arsenal tana trophy lian tham panga lo la tawh, he club tana lo khel hrep tawh a ni bawk a, a thinlungah pawh he club hi chu a tla na chiang a. A kaihhruaina hnuaiah hian thil pakhat chiah kan ngaihtuah a, chak chhoh leh tawh hi kan tum ber a ni,” tiin Aubameyang chuan a sawi.