17 Jan 2020 05:16

inkhel

Liverpool tan champion loh a har tawh ang: Redknapp

Jamie Redknapp chuan tun season-ah Liverpool tan Premier League champion nih loh chu thil harsa tak nih tawh zawk tur thu a sawi.

Liverpool chu season kal mekah an che tha chho hle a, Premier League-ah hma an hruai fal tan viau mai a, kum 30 zet an lo nghahfak tawh league title la thei turin an dinhmun a tha tawh hle.

Premier League title lak an tumna kawngah harsatna an tawk leh thin a, season liam taah pawh khan point 97 zet hmu mah se season tawpah Manchester City an tluk ta lo chiah a, pahnihna an ni a. Tun season-ah erawh dinhmun duhawm takah an ding mek a ni.

Jurgen Klopp kaihhruaina hnuaiah UEFA Champions League title an la a, hemi hnuah hian UEFA Super Cup leh Club World Cup trophy te an la zui leh bawk a. Premier League lamah lah an chak tluang chho viau bawk a, an zinkawng zawh lai chu player te pawhin phur takin an zawh zel a ni.

Reds midfielder hlui Jamie Redknapp chuan, “Liverpool chu kuminah an rawn hlauhawm hle a, a tir atangin an che tha hle a, league title chu an ta a ni ber tawh e,” a ti.

“Tuna an dinhmun thlir hi chuan champion tur chiang saah an ngaih theih tawh a, an tan chuan champion loh hi thil harsa tak a ni tawh mah mah zawk,” a ti bawk.

A sawi zelnaah, “An awmnaa awm thei tur hian hma an la nasa a, tihpalh thil thua hetiang dinhmuna ding hi an ni lo chiang a. A hma daih atang tawhin player lei kawngah an fimkhur em em a, an tana tha tur chiah an lei zel a, hei hi an tangkaipui ta a ni,” a ti.

“Player te leh staff te pawh tu mah hi an inchhuang lo hle a, tu te pawhin club hmasawnna atan tha thawh an duh vek a, team tangrual tak an ni a, hei vanga hetiang dinhmun thleng thei hi an ni,” tiin a sawi bawk.