Liverpool player te hi kum 4 tal inthen darh lo ila: Van Dijk

28th May 2019, 11:05PM

Virgil van Dijk chuan Liverpool team ‘special’ takte chu la awmho zel tura a duh thu sawiin, a lo berah kum li chhung tal chu inthen darh lo thei se a duh thu a sawi.

Liverpool chuan tun season UEFA Champions League final an lut a, final lut thei tur hian an kalkawngah Barcelona chu ropui zetin an lehthal a. Premier League lamah pawh an che tha hle a, a tawpah Manchester City chu point 1 chiahin an pha ta lo a, pahnihna an ni.

Inrinni hian Marid khawpuiah Tottenham Hotspur nen Champions League final an khel dawn a, European title la thei ngei turin an inbuatsaih nasa hle a. Hetiang boruak karah hian defender Virgil van Dijk chuan Liverpool player te chu a fak hle.

Van Dijk chuan, “Reds player te hi an special hlawm hlein ka hria a, he team-ah hian hruaitu tha ni thei mi eng emaw zat an awm nghe nghe a. Hei tluka pawimawh hi team tan chuan a awm loin ka hria a, khelmual chhung leh pawnah thil tha kan inhrilh tawn char char thei zel a ni,” a ti.

“Thil sawi fel ngai a awm pawhin player special awm khawm kan ni bawk a, harsatna a awm ngai lo hle a. A lo berah kum li emaw, kum nga emaw tal chu kan vai hian ka awm khawm thei zel ila a duhawm dawn khawp a. Chutiang a thleng thei a nih ngat chuan he team hian thil tam tak an hlen chhuak thei ngei ngei dawn a ni,” a ti bawk.

Kum 27-a upa Van Dijk hi tun season chhungin a che tha hle a, PFA Player of the Year chawimawina pawh a dawng hial a. Dutch defender hian Liverpool tlar hnung a tiphui tha viau mai a, 2018-19 season chhungin Premier League game 38 a khel kim thei vek a, inelna hrang hrangah game 49 a khel tawh a, UEFA Champions League final-ah a tel a nih chuan tun season chhungin game 50 a khel tling thei chiah ang.

Game a khelh hnem theih dan chungchanga zawhna chhangin Van Dijk chuan, “Rilru hi a pawimawh hmasa berin ka hria a, na nei miah loa inkhelh hi chu thil theih loh tlukah ngai hmasa hmiah mai ila a fuh ber. Kar tir lam atanga hun harsa tawn chhoh chang chu ka ngah ve thei viau mai a, mahse a tawpah chuan rilru ka siam fel a, kar tawp inkhelah tel ngei ka tum tlat thin a. Ka tum miau avangin ka tel thei ve leh zel mai a ni,” a ti.

“Ka theih ang tawkin ka inenkawl uluk a, chaw ka ei tha a, na ka neih emaw, harsatna ka neih emaw pawhin ka inenkawl uluk hle a, hma ka sawn chak theih phah thin a. Tun thlenga tluang taka kan kal thei hi thil awlsam lo tak a ni a, tunah chuan hun khirh tak mai pakhat paltlang tur kan la hmabak a ni,” a ti bawk.

Copyright © inkhel.com 2024. All rights reserved.