Liverpool leh Crystal Palace te chu Marc Guehi chungchangah an inrem fel ta a, Liverpool hian England defender manah hian £35million an thehchhuak a, hei hi Palace chuan an lo pawm ta  a ni. Guehi hian kum 5 chhung atan Anfield-ah contract a ziak dawn a ni.

Inrinni khan Liverpool chuan Guehi an lei ngamna zat chu £35m a ni tih Palace an hrilh a, ani hian Selhurst Park-ah kum 1 chiah contract a nei tawh a, Palace director pawhin an defender hi hralh an tum thu a lo sawi chhuak tawh a nih kha.

Pathianni zana si thum faia Aston Villa an hneh pawh khan Guehi hian goal a khung nghe nghe a nih kha. Zanin dar 11:30 (IST) hian transfer bazar khar a ni dawn a, hemi hma hian tihfel ngai zawng zawng tihfel hman an tum dawn a ni.

Nikum nipui bazar inhawn lai khan Newcastle United chuan vawi 4 lai Guehi hi an dawr a, a tawpah phei kha chuan £65million ($86.4m) bakah add-ons an thehchhuak a nih kha. Mahse Crystal Palace chuan an lo hnar vek a ni.

Kum 2021 khan Guehi hian Chelsea atangin Palace a zawm a, Palace tan game 155 a khel tawh a, FA Cup no mawi a chawipui tawh bawk a ni.

England tan game 23 a khel tawh a, 2024 Euro-ah pawh England player pawimawh tak a ni nghe nghe.

Liverpool hian an defender Jarell Quansah chu Leverkusen hnenah £35million-in an hralh a, Virgil van Dijk, Joe Gomez leh Ibrahima Konate te chu an innghahna a ni. Van dijk a lo upa ve tawh a, Konate pawhin Real Madrid pan a tum niin a lang mek bawk a, an tlarhnung thawm that chu Arne Slot-a hna pawimawh a ni a, Guehi hi an la dawn ta a ni.