Ukrainian forward Andriy Yarmolenko chuan tun nipui hian Dynamo Kiev chhuahsan a tum a, Liverpool leh Tottenham-in lakluh an duh niin Daily Mail chuan an tarlang.

Yarmolenko hian tun season-ah Dynamo hi league-ah a champion pui a, tun nipui hian chhuak turin club lam pawh a be fel tawh tih a sawi.

Chhuak thei anih vang hian Liverpool leh Spurs hian an club-a khel turin sawm luh an duh a, £20m man vel a ni dawn a club thenkhat pawhin lakluh an duh tih tarlan a ni.

Kum 25 mi Yarmolenko chuan, "Tun hi club thlak hun tak niin ka hria. Kan champion hma chu Dynamo hi ka chhuahsan dawn lo tih ka tiam a, tunah chuan champion kan ni ta ka thu tiam hi ka hlen. President-in chhuah ka duh tih a hria a, hemi chungchang hi kan sawn nawn tawh." tiin a sawi.

Yarmolenko hian sawmtu a nei nual tih a sawilang bawk a, khawi lam nge a pan dawn erawh hriat ala nilo.

Sawi chhunzawmin, "Hmasawn zel ka duh a, khawi club nge ka zawm dawn tih hi tih chian a har. Team tha tak tak luh theihna tur chu an awm. Intihsiakna lianthama khel turin chakna leh inrintawkna ka nei a, Europe lamah khelh tam ka duh chuan chhuah hi a ngai." a ti.

Yarmolenk hian England lama khelh a duh ber niin sawi a awm a, mahse Paris Saint-Germain lamin hlawh tha taka thlem luh an tum niin sawi a awm ve mek bawk a ni.