Liverpool leh Premier League player ropui nih ka duh: Sadio Mane

19th April 2019, 10:04PM

Sadio Mane chu tun hnaiah Real Madrid nen an sawi zawm nasa hle a, hetih lai hian Mane chuan Liverpool leh Premier League player ropui nih a duh thu a sawi.

Tun season chhungin Sadio Mane hi a che chhe hran lo hle a, hei vang hian Real Madrid mit pawh a la viau niin an sawi a. Season thar tan hmaa Bernabeu lama seng luh an rilruk zingah an sawi tel niin thawm a awm chho a, mahse Mane hian Anfield-a player ropui te zinga sawi tel nih ngei a duh thu a sawi a, hei vang hian Real Madrid beiseina pawh a thamral mai dawn nia ngaih theih a ni.

UEFA Champions League quarter final-ah Mane hian FC Porto lakah goal hmahruai a thun a, tun season chhungin goal 22 a thun tling tawh a, Reds chu semi final a luhpui zui a ni.

“Liverpool player ropui, nakin thlenga an sawi reng nih theih ka duh a, Premier League player ropui zinga sawi tel nih theih ka duh bawk a. Hetiang ni thei tur hian tun atangin theihtawp chhuah chhoh zel hi ka tum a ni,” tiin Mane chuan a sawi.

“Game 100 khelh theih hi a hluin a ropui hle a, Liverpool tana hetiang zat ka khel thei hi ka lawm em em mai a. Ka sawi fo tawh angin he club tana ka khel thei hi ka lung a awi hle a, helai hmun hi nitin nuam ka ti thar a ni ber a. He club tan hian eng trophy emaw tak chu lak theih ngei ka tum hle a ni,” a ti bawk.

Tun season-ah Liverpool chu Premier League title la thei dinhmunah an ding chho mek zel a, Mane hian an coach Jurgen Klopp chu a fak hle a, tun dinhmun a thlenpui thei chu fak loh chi a nih loh thu a sawi chhuak.

Mane chuan, “Jurgen Klopp hian a player te hi a ngainain a duh em em vek a, tu nen pawh inkungkaihna tha tak a nei thei zel bawk a. Thil phut tam tak a nei a, mahse heti chung hian tu mah hi uchuak takin a nawr ngai lo a, kan theihtawp chhuah tur erawh chuan min phut vek thu a sawi thin,” a ti.

“Kan theih ang tawka thaa che turin min beisei thin a, khelmualah hun nuam tak hmang turin min chah fo thin a. Min enkawl dan hi a tha hlein ka hria a, a kaihhruaina hnuaiah tu te pawhin hma kan sawn a, kum tam tak chu min la kaihruai zel se tih hi ka duhthusam a ni,” a ti bawk.

Copyright © inkhel.com 2024. All rights reserved.