14 Jan 2020 05:24

inkhel

Liverpool leh Manchester City ka thik lo: Mourinho

Jose Mourinho chuan squad nei chhah tak Liverpool leh Manchester City te chu a thik loh thu a sawi.

Manchester City chuan Premier League title chu a zawnin vawi hnih an la tawh a, tun season kal mekah Liverpool chu hma an hruai fal viau tawh bawk a. Nikum November thlaah khan Tottenham Hotspur chuan Jose Mourinho chu an club enkawl turin an ruai a, tun dinhmunah pariatnaah an awm mek a ni.

Portuguese coach chuan an club chu Manchester City leh Liverpool te nen khaikhin chi an nih loh thu sawiin, hetiang hi an dinhmun a nih rualin pawi a tih loh thu a sawi tel bawk a ni.

Mourinho chuan, “Kan team hi team dangte nen khaikhin chi a ni lo a, team dangte squad ang kha kan nei ve thei kher lo a. Tuna kan nih ang hi kan dinhmun dik tak chu a ni mai,” a ti.

“Manchester City leh Aston Villa inkhel kha ka en a, City substitute bench kha ka en a, Raheem Sterling, Bernardo Silva, Ilkay Gundogan leh Nicolas Otamendi te an la awm thei ania,” a ti bawk.

A sawi zelnaah, “Liverpool pawh an tha hle tih chu kan hre tlang vek a. Substitute bench lama thu pawh tawrhhlelhawm tak tak an la ni thup hlawm a. Player inhliam pawh an hrawl tham viau a, Joel Matip, Dejan Lovren, Naby Keita leh Fabinho te an ni hlawm,” a ti.

“Team dangte hian squad chhah tha tak tak nei mah se ka thik hauh lo a. Hna duhawm tak mai ka nei a, chu chu lawm takin ka thawk mek a. He club hi chu club dang ang a ni lo a, club danglam bik a ni,” tiin Mourinho chuan a sawi a ni.

Jose Mourinho hian 2002 kum tir lama Porto a enkawl hnuah Spurs enkawl chu a hna chelh tawha hautak ber a nih thu a sawi chhuak a. Real Madrid, Inter Milan leh Chelsea boss hlui hian Porto chu 2004 kumah khan UEFA Champions League title a lakpui a ni.