Liverpool legend tia hriat reng nih ka duh: Virgil van Dijk

22nd February 2019, 01:02AM

Virgil van Dijk chuan kum 16 mi chauh a la nih lai kha chuan centre back anga khel tura a la that tawk loh thu sawiin, tunah chuan Liverpool player ropui tia hriat reng nih a duh thu a sawi chhuak.

Dutch defender Virgil van Dijk chu kumin January thlaah Liverpool in an la lut a, Anfield a luhchilh atangin boruak a nei tha nghal hle a. Tun dinhmunah chuan Van Dijk hi a khelhna position anga khel zingah khawvela a tha ber pawla sawi a ni mek a ni.

Tun season-ah Liverpool chu Premier League-ah an che tha hle a, title la thei dinhmunah an ding chho mek a, Premier League game khelh tawh chinah Liverpool chu goal chhuah tlem ber an ni mek a. Hetiang taka goal an chhuah tlem theihna chhan bulpui pakhat Virgil van Dijk chu Player of the Year chawimawina dawng thei tura rin kai zingah an sawi tel a ni.

Van Dijk chuan Liverpool defender ropui tak tak Alan Hansen, Jamie Carragher leh Ron Yeats te huanga awm ve theih chu a duhthusam a nih thu sawiin, chutiang dinhmuna ding thei tur chuan theihtawp chhuah a tum thu a sawi.

BBC Radio Five Live in an kawmnaah Anfield-ah chuan eng anga hriat reng nge nih a duh tiin an zawt a, Van Dijk chuan, “Liverpool legend tia hriat reng nih theih ka duh,” tiin a chhang.

“Anfield-ah hian thil ropui tak tak tihpuitlin theih ka duh a. Squad tha em em mai kan nei a, tunah tak phei hi chuan mamawh ang chu kan nei vek a tih theih hial a, a pawimawh tur ang chu neih loh kan nei lo tiin a sawi theih,” a ti.

A sawi zelnaah, “Liverpool hian min lei theihna turin theihtawp an chhuah a, beihpui an thlak hial a. Hei vang tak hian kei pawhin ka tana theihtawp chhuahtu tan hian ka theihna zawng zawng hlan let ve hi ka tum a ni,” a ti bawk.

Feet 6 leh inches 4 a sang centre back Van Dijk hian kum 29 chhung ngawt mai Liverpool in an lo tih theih loh, league sang ber title lak theih chu a duh thu sawiin, Reds ho duhthusam hi a taka thlentir ngei a duh thu a sawi.

Dutch club Willem II ah kum 16 a nih lai velin a khel thin a, hetiang lai hian Van Dijk chu right back angin an khelhtir thin a ni.

“Kum 16 ka nih lai chuan ka sang lo hle a, ka nau chu kei aiin a sang zawk daih a. Harsatna neuh neuh ka nei thin a, hei vang hian duh ang takin ka inkhelh theih loh phah fo a. Right back angin min khelhtir thin a, ka che a muang a, centre back ni tur khawpin ka tha ngai lo a. U19 a ka khelh atang chauhin ka tha chho ve tan a, captain ka ni thei ta hial thung a ni,” tiin Van Dijk chuan a sawi.

Copyright © inkhel.com 2024. All rights reserved.