25 Mar 2020 11:35

bakteaJr.

Mizo tlangval

​Liverpool ka zawm lo kha ka tih sual lian ber a ni: Bowyer

Premier League player hlui, tuna Charlton manager ni mek Lee Bowyer chuan hun tha a neih laia Liverpool a zawm lo chu football-a a tih sual lian ber a nih thu a sawi.

Kum 43 mi Bowyer hi Leeds United tana a khelh laiin, Liverpool chuan an dawra,  Bowyer hi Anfield-ah insuan teuh hle mahse Liverpool dawrna chu hnar leh ta zawkin hei hi a inchhir hle niin a lang.

Bowyer hi kan hriat dan tur chu kum 2005 khan Newcasle-ah a khel a, hemi kum April ni 5-a Newcastle leh Aston Villa-te an inhmachhawn tumin Bawyer leh a team-mate Kieron Dyer te an intibuaia, khelmual chhungah an insual a nih kha.

Bowyer hi Charlton academy chhuak a ni a, kum 1996 khan Leeds panin, kum 2003 thleng Leeds tan hian a khel a, kum 2002 khan kha tih hunlaia Liverpool manager Gerard Houllier chuan Anfield-ah hruai luh tum mahse Bowyer hian a lo hnar niin a lang.

Bowyer chuan Liverpool a zawm tep chungchang sawiin, “Liverpool kha ka zawm teuh em em a, medical pawh a chanve vel lai chu ka nei hmana, mahse keimah kha ka lung a awi thei zan lova, ka hnar leh ta zawk.

“Kha tih hunlaia Liverpool ka zawm lo kha football-a ka tih sual lian ber a ni a, hun hi her let thei ila chuan Liverpool kha ka zawm ngei ang. Ka thlir kir hian thutlukna dik lo ka siam tih ka inhre thin. Leeds-a ka hun kha a tawp hnai tawh tih ka hriaa, chhan hrang hrang a awm a, ka chhuah thuai a ngai dawn tih ka hre sa.

“Mahse kum ruk vel lai hmar lamah ka khela, ka chhungte lak atangin ka awmna a la hla em em a, kum nga dang vel a hma aia hlaa awm leh kha thil dik niin ka hrelo. Mahse a hnu khan Newcastle ka zawm ta tho a, Newcastle phei kha chu Liverpool ai pawhin a la hla leh chhawnga, ka khawsak dan kha awmzia a awm hlawl lo. Mahse a hunlai kha chuan Liverpool zawm kha dik theiin ka hre thlawt lova, ka tih sual phah ta reng bawk a ni,” a ti.