Premier League chuan 2018-19 season chhunga club 20 te inkhel lai TV lama tihlan vanga sum hmuh dan an puang a, Liverpool chu sum hai lut hnem ber niin, champion Manchester City ai pawhin an la lut hnem zawk a ni.
Jurgen Klopp leh a pawlte Liverpool chuan season tluanin £152.4 million zet mai an la lut a, Pep Guardiola pawlte inkhel aiin an inkhel chu UK TV lamah vawi thum an pek chhuah hnem zawk avanga sum hui hnem thei hi an ni.
Liverpool-in Premier League game an khelh hi tun season chhungin vawi 29 ngawt mai TV-ah en theihin an tichhuak a, anni aia TV lama en tur tam hi an awm lo a. Manchester City inkhel chu UK TV ah vawi 26 chu an tichhuak bawk a, a pumpuiah City hian £150.97 million chu an hai lut a ni.
Season liam taah khan Premier League club te zingah £150 million la tling thei an awm lo a, tun tumah erawh Liverpool leh Manchester City te chuan an khum thei ve ve a ni.
Chelsea chu sum lak luh lamah hian pathumna an ni a, season tluana an sum hmuh hi £146.03 million niin, palinaa awm Tottenham Hotspur aiin £800,000 in an la lut hnem zawk a, Spurs hian £145.23 million chu an la lut a ni.
TV lama an inkhel tih chhuah vanga sum hai luh hnem lama pangana Manchester United inkhel chu vawi 27 an tichhuak a, a vaiin £142.5 million chu an la lut a. An hnuai chiahah hian Arsenal awmin, paruknaa awm Gunners hian £142.19 million an la lut bawk a ni.
Season tawpa a mawng phaha awm Huddersfield Town chiah chu £100 million la lut tling lo an ni a, an sum lak luh zat hi £96.63 million a ni a. Heti chung hian Terriers sum lak luh zat hi Spanish club Valencia in tun season chhunga an lak luh aiin a la tam zawk a. Valencia hi La Liga-ah palina niin, season thara UEFA Champions League khel thei turin tling mahse an sum hai luh chu £57.94 million a ni.
Club hrang hrangte sum lak luh dan:
Liverpool - £152.43million
Manchester City - £150.97million
Chelsea - £146.03million
Tottenham Hotspur - £145.23million
Manchester United - £142.51million
Arsenal - £142.19million
Everton - £128.60million
Wolves - £127.17million
Leicester City - £123.33million
West Ham United - £122.53million
Newcastle United - £120.13million
Crystal Palace - £114.22million
Watford - £113.90million
Bournemouth - £108.14million
Burnley - £107.34million
Brighton - £105.734million
Southampton - £104.30million
Cardiff City - £102.70million
Fulham - £101.90million
Huddersfield Town - £96.63million