Liverpool chuan an khelmual Anfield ah captain Steven Gerrard hun tawp dawn goal hmangin an mikhual QPR chu 2-1 in an hneha, Champions League khelh beiseina chhete an la nei ve zel.
He inkhelah hian Coutinho chuan goal hmahruai khungin QPR in Fer hmangin an chhang leta, Onuoha chuan hun tawp hnaihah double yellow card avangin hnawhchhuah a tawka, chakna goal Gerrard chuan hun tawp dawn tak tak ah a khung hram bawk. Chakna goal khungtu Gerrard hian goal a thun hma in penalty a hlah hlauh bawk.
Liverpool 2-1 QPR
(Coutinho 19′ Gerrard 87') (Fer 73′)
Line up
Liverpool - Mignolet, Can, Skrtel, Lovren, Johnson (Markovic - 84' ), Henderson, Gerrard (Lucas- 89' ), Coutinho, Sterling, Lambert, Lallana (Ibe - 68')
QPR - Green, Onuoha, Dunne, Caulker (Yun Suk-young - 45' ), Hill, Phillips, Barton, Sandro, Henry (Zamora - 71' ), Fer, Austin
An tlawmna avangin QPR hi point sarihin an him hriha, game thum khelh hmabak an la nei bawk. Inkhelh tan hmain Rodgers aia Benitez an duh zawk thu Liverpool fans ten thlawhna a tar banner hmangin an lantira, Gerrard chet velna avangin fans te thiltih erawhin ngaihven a hlawh nep deuh dawn a ang.
Adam Lallana leh Rickie Lambert te ho nen Gerrard a rawn inlan thei leh thei tawha, team pahnih player ten inkhelh laiin armband dum Ferdinand-a nupui vawiin maia boral ta sun nan an rawn hreng vek bawk a ni.
Zamora aia dah luh Fer chuan 1' ah corner atangin goal a khung nghala, corner pet tu Phillips a corner chu line pawnah a kual chhuah hman avangin pawm sak a ni lo thung. 8' ah Phillips bawk chuan hlauhawm takin ball a thawlh lut leha, Caulker bula tlain ani chuan a lo chhawr tangkai thei lo hlauh.
Liverpool chance hmasa bera sawi theih Lambert chuan Barton tihsual atangin a hmua, pen 20 vela hla atanga a shot chu Green chuan a lo dan sak ve leh a. 19' ah Lambert siamsak hmangin Coutinho chuan mawi zetin Liverpool goal hmahruai a khung chhunzawm.
33' ah Sterling chuan Henderson pass tha tak chhawr tangkaiin goal a khunga, offside phar a nih avangin pawmsak a ni lo ve bawk. QPR top scorer nilai Austin chuan chance tha a hlah ve bawka, Green chuan Gerrard freekick a dan sak bawk.
Second half an tan atanga minute nga a liam tihah Lallana chuan Coutinho ball pek atangin a thun dawn emaw tihah a thelh ve khauh bawk. Liverpool in chance tha an hlah chhunzawma, Henderson cross tha zet chu Sterling chuan lo dawngin ho lutukin a pet over ve hlauh a ni.
Liverpool chuan chance tha an hmuhte goal ah an chan tir thei lo zela, 73' an tuar ta nge nge a ni. Mual dinglam atanga Barton freekick pet atangin QPR chuan Fer hmangin goal an khung ve ta. 79' ah Gerrard chuan penalty a rawn hlah ve hlauh bawk a. He penalty hi Onuoha a'n Skrtel a pawh thluk avanga a chawi a ni a, 82' ah Ibe laka a foul nawn leh sak avangin hnawhchhuah a ni chhunzawm bawk.
1-1 a an inhnehtawk mai dawna a lan hnuah penalty a hlahna hliahkhuh turin Gerrard chuan 87' ah Coutinho corner atangin chakna goal a rawn tauh goal ve ta hram a, 2-1 in mual neitu Liverpool chuan hnehna an chang ta a ni.