Transfer window inkhar hma ni hnihah Liverpool chuan Marc Guehi an lei ngamna zat Crystal Palace an hrilh a, Reds hian £35million-in bid an thehlut ta niin David Ornstein chuan a tarlang.

Kum 25 mi England international hian kum khat chuan Selhurst Park-ah contract a nei tawh a, Palace boss Oliver Glasner pawhin an defender hi an hralh a rin thu a lo sawi tawh bawk a nih kha.

Tun thla tir lam khan Liverpool leh Palace te chu Guehi chungchangah hian an lo indawr tawh a, indawrna a kal zel a, tunah chuan a hmawr an bawk dawn ta a ni.

Nikum nipui bazar inhawn lai khan Newcastle United khan vawi 4 lai Guehi hi an lo dawr tawh a, a tawpa an bid-na phei chu £65million ($86.4m) baka add-ons a tel nghe nghe.

Marc Guehi hian Liverpool pan a duh ber a, Liverpool pawhin England defender hi an lak theih an inring hle bawk a, indawrna hi a kaltluan rin a ni a, inremna an neih vat rin a ni.

Kum 2021 khan Guehi hian Chelsea atangin Palace a zawm a, Palace tan game 155 a khel tawh a, FA Cup no mawi a chawipui tawh bawk a ni.

England tan game 23 a khel tawh a, 2024 Euro-ah pawh England player pawimawh tak a ni nghe nghe.

Liverpool hian an defender Jarell Quansah chu Leverkusen hnenah £35million-in an hralh a, Virgil van Dijk, Joe Gomez leh Ibrahima Konate te chu an innghahna a ni. Van dijk a lo upa ve tawh a, Konate pawhin Real Madrid pan a tum niin a lang mek bawk a, an tlarhnung thawm that chu Arne Slot-a hna pawimawh a ni ta a ni.