Tun Premier League season kal meka game khelh tawh china game pawimawh bera chhal theihah Liverpool chuan Anfield-ah champion lai Manchester City an lo mikhuala, Liverpool hian 3-1 in hnehna an changa, table lera an dinhmun an sawhnghet.
Liverpool hian first half-ah Fabinho leh Mohamed Salah te goal hmangin si hnih faiin hma an hruaia, Sadio Mane chuan second half tir lamah Liverpool goal thumna khung lehin Bernardo Silva chuan Manchester City tan hun tawp hnaih lampang deuhah goal khat a khung ve bawk.
Liverpool hi Anfield-ah league game a zawnin vawi 13 an chak tawha, heti ang hi kum 34 hnuah an tih leh theih vawi khatna a ni nghe nghe a, mahse Liverpool hian tun season-ah Anfield-ah clean-sheet an la nei miah lo thung.
Manchester City hian khelh 12-ah point 25 an hlawhchhuak tawha, hei hi Pep Guardiola-a’n a manager career-a top-flight league-ah game 12 hnua a point hlawhchhuah tlem ber tum a la ni. Guardiola hi Anfield-ah manager angin vawi li a tlawm tawha, stadium pakhata heti ang zat tlawm hi a la nei ngai lo. Guardiola hi manager hna a chelh hnuah Jurgen Klopp-a lakah vawi 7 ngawt a tlawm tawh bawka, Klopp aia hneh loh ngun hi Guardiola hian a nei lo bawk.
Khelh 12-ah Liverpool hian point 34 an hlawhchhuak tawha, City hi point 9-a tlansanin pahnihnaa awm Leicester City aiin point 8-in an sang zawk. City hian khelh 12-ah point 25 hlawhchhuak tawhin pahnihna atangin palinaah an tla thla a, an chung chiaha awm Chelsea chu point khatin an pha lo mek thung.
Liverpool 3-1 Manchester City
(Fabinho 6’, Salah 13’, Mane 51’) (Bernardo Silva 78’)
Player Ratings
Liverpool: Alisson 8, Alexander-Arnold 8, Van Dijk 7, Lovren 7, Robertson 7, Fabinho 9, Wijnaldum 7, Henderson 8, Salah 8, Firmino 7, Mane 8. Subs: Milner 6, Gomez 6, Oxlade-Chamberlain N/A.
Manchester City: Bravo 4, Walker 4, Stones 5, Fernandinho 5, Angelino 6, Rodrigo 5, Gundogan 5, De Bruyne 6, Bernardo 6, Sterling 7, Aguero 4. Subs: Jesus 5.
Match Report
Inkhel an tana, inkhel a tang tih a hmuh theih nghal. City hian Liverpool an nawra, a tir teah freekick pawh an hmu. 5mins vel khelh a nihin City hian penalty hmu ngei turin an inngai a, ball chuan Trent Alexander-Arnold-a ban fuh ngeiin lang mahse referee chuan penalty a pe lova, VAR pawhin referee thutlukna a ti danglam lo.
City-in penalty an beisei hnu chiah hian Liverpool chuan goal an khung nghala, Mane chuan veilamah ball chak taka khalhin box chhungah ball a cross pheia, lo dan sak niin yard 25 vela hlaa awm Fabinbo chuan ball a lo chang; Fabinho hian hla tak atangin goal-ah kawh takin ball a pet pheia, mawi em emin goal-ah lutin Liverpool in hma an hruai der.
City hian chhanlet nghal an tuma, mahse Raheem Sterling chuan a chance neih chu goal-ah a chantir thei lo. 13mins-ah Liverpool chuan an goal hnihna an khung leh nghala, Andy Robertson chuan veilamah ball khalhin, City box chhungah ball a pe lut, City defender te chuan ball hi an khawih lo veka, far post lama awm Salah chuan ball a sawh hnu lawkah mawi takin goal-ah a lo tauh luta, si hnih faiin Liverpool chuan hma an hruai. 20mins vel khelh a nihin Liverpool in an goal thumna an khung tepa, veilamah Mane leh Robertson in ‘combi’ tha hle mahse hlauhawma a chhuah hma in City left back Angelino chuan a lo thian fai hman.
City hian darkar chanve khelh a nih hma deuhin goal an khung teuh hle a, Sergio Aguero chuan veilam atangin ball a laluta, box chhung vel chiah atangin goal-ah shoot mahse Alisson chuan tha em em in a lo save. Hemi hnu lawk hian Angelino chuan chance nei ve leh mahse hlauhawmah a chhuak lo. Team hnihte hi an innawr tawn zak zak renga, mahse half chance bak an insiam thei lutuk lo.
37mins-ah Roberto Firmino chuan box chhung atangin goal-ah a ball a peta, mahse City keeper Claudio Bravo chuan a lo save. Half time hma deuhin Aguero chuan box pawn veilam deuh atangin chak takin box chhungah ball a khalh luta, far post lamah lei hrulah petin, pet chhe lem lo mahse goal a zawn lo deuh.
Half time hma chiahin Liverpool hian goal dang an khung teuh hle a, Firmino chuan box pawn veilam atangin box pawn goal zawn lama awm Salah chu ball a pe pheia, Salah hian goal-ah mawi takin ball lo shoot mahse Bravo chuan tha takin a lo save a, first half hi 2-0 a tihtawp a ni.
Second half an tan a, inkhel pawh a hmuhnawm leh nghal. Second half tan tir lamah minute sawm pawh khelh a nih hma in dinglam atanga ball cross luh chu far post lama awm Mane chuan City goal-ah ball a lo tauha, Bravo chuan khawih mahse goal-a lut tur dang zo lovin Liverpool hian 3-0 in hma an hruai zui.
City lamin chance an nei zui ve leha, Sterling chuan box pawnah ball khalhin goal-ah a pet zuia, mahse Dejan Lovren chuan lo khawihin goal a kal kan. City hian chance an insiam zui deuh renga, mahse an chance neih te an chhawr tangkai tawk lova, goal hmaah an hriam tawk lo a tih theih.
78mins-ah City chuan goal an khung ve ta hrama, box chhung veilam atangin Angelino chuan box chhung dinglama awm Bernardo chu lei hrulah ball a pe pheia, Bernardo hian lo pet nghalin, near post lamah nalh takin a luta, City beiseina thar a pe.
City hian an si phurh te sut zawh tumin bei viau mahse Liverpool in an defence that zia an ti langa, Liverpool hian an team inkhairual zia an tilang bawk. City hian 64-mins ah penalty dang an beisei viaua, Reds box chhunga Sterling-a ball khalh lai chu Mane chuan a nam thlu angin lang mahse referee leh VAR chuan penalty pekna tlakah an ngai lo ve ve. Inkhel hi 3-1 in a tawpa, Liverpool hian hmahruaitu an nihna dinhmuh sawhnghet sauh sauhin, an champion zui mai ring tu pawh an tam tawh viau a ni.
