13 Sep 2020 12:28

bakteaJr.

Mizo tlangval

​Liverpool-in penalty hmangin Leeds an hneh hram

Premier League champion lai Liverpool chuan tun season-a an game hmasa berah, season liamta Championship champion Leeds United chu Anfield-ah an lo mikhuala, Liverpool hian 4-3 hnehna an chang.

Champion lai pahnih inkhel hi a hmuhnawm hle a, a tir dakar chanve vel chhungin goal nga lai a lut. Liverpool tan hian Aigupta mi Mohamed Salah chuan hattrick a siama, a goal pahnihte hi penalty an ni a, Virgil Van Dijk chuan goal khat Reds tan hian a khung ve bawk.

Leeds hi Premier League champion lai lakah an nep lo hle a, Manchester City atanga loan-a an lakluh Jack Harrison, Patrick Bamford leh Mateusz Klich te chuan goal khat theuh an khung.

Team hnihte khel a hmuhnawm dun hle a, Premier League fixture puan a niha, opening day-ah Liverpool leh Leeds an intawng dawn tih hriat a nih khan mi tam tak ngaihven a hlawh nghala, beisei ang ngeiin inkhel a hmuhnawm hle a, goal 7 lai a lut.

Inkhel an tana, minute tam khelh a nih hma in Salah shot chu Leeds defender thar Koch chuan a lo block-a, chiang takin a banah a fuha, referee-in penalty pe zui nghalin, Salah chuan an penalty hlawhchhuah hi goal-ah chantirin si khat faiin Liverpool-in hma an hruai.

Minute sawm chuang hret khelh a nihin, Leeds hian goal pui tak an khunga, Phillips-a’n long ball tha zet a pek chuan Harrison mual veilamah nalh takin a lo la a, cut luh pahin Alexander-Arnold a bum hnuah, Joe Gomez a paltlang leha, Van Dijk a rawn inrawlh hma chiah Harrison hian mawi takin goal-ah ball a chhuih lut. Harrison hi kum 16 hnuah Leeds tana Premier League goal khung leh thei hmasa ber a ni a, hriat reng tlakin a mawi hle bawk.

20mins khelh a nihin Liverpool hian a hma an hruaia, Andy Robertson-a’n corner atanga ball tha em ema a vawrh luh chu, Van Dijk chuan goal-ah chiang takin a lo tauh luta, 2-1 a ni. Darkar chanve khelh a nihin Leeds hian an si phurh an suta, Van Dijk-a’n ho taka a tihsual chian em em chu, Leeds striker Bamford chuan hmang tangkaiin goal a khung zuia, 2-2 a ni.

Bamford-a goal khung atanga minute thum hnuah Liverpool hian a vawi thum nan hma an hruaia, goal khungtu hi Salah a ni; veilamah Liverpool hian freekick hmu in, Leeds box chhungah pet luh a ni a, Leeds lamin clear tum mahse, rem takin Salah tan an siamsak a ni bera, Salah hian chiang em em in goal-ah a pet luta, 3-2 a ni a, first half-ah goal a luh belh tawh lo.

70mins khelh a nih hma deuhin, Leeds hian a vawi thum nan an si phurh an suta, Klich chu box chhungah inpawt lutin Costa chuan ball tha tak a pe a, Klich hian goal-ah pet lutin, 3-3 a ni a, inkhel a hmuhawm hle. Liverpool hi an chungnung zawka, mahse Leeds pawh an khel tha a, an tlar hma an hmuhnawm thin hle.

Leeds defender te leh an goalkeeper an che sual leh khut thina, goal erawh an chhuah phah ngai lova, an vannei angreng hle. 3-3 in team hnihte hi an inhnehtawk mai dawna a lan hnua, Liverpool hian hun tawp hnaih lamah penalty an hlawhchhuak hlauh; Leeds striker thar Rodrigo chu second half-ah luh tir niin, ani hian hun tawp dawn lamah Fabinho chu an box chhungah a titlu a, Leeds-in penalty an chawi. Penalty hi Salah bawk chuan petin, Leeds keeper Meslier chu chiang takin a buma, Liverpool chakna goal a khunga, 4-3 in inkhel a tawp a ni.

Liverpool 4-3 Leeds United

(Salah 4’pen, 33’, 88’pen, Van Dijk 20’) (Harrison 12’, Bamford 30’, Klich 66’)

Player Ratings

LIVERPOOL: Alisson 6, Alexander-Arnold 5, Gomez 5, Van Dijk 6, Robertson 6, Henderson 6, Wijnaldum 6, Keita 6, Salah 8, Firmino 7, Mane 7. Subs: Fabinho 6, Jones 6, Matip n/a. 

LEEDS UNITED: Meslier 7, Ayling 6, Koch 6, Struijk 7, Harrison 7, Klich 7, Dallas 7, Phillips 7, Costa 7, Hernandez 6, Bamford 7. Subs: Roberts 6, Rodrigo 5, Shackleton n/a.