Manchester City midfielder James Milner chuan Liverpool a pan dawn niin a lang ta a, an inbiakna a kaltluang hle.

Kum 29 mi Milner hian Manchester City-ah hunrei tak daih contract a nei tawh lo va, tawp mai tur a ni tawh a hei vang hian a thlawnin Liverpool hian an lalut thei ang..

An inbiakna hi a kaltluan chuan July ni 1-ah The Reds hi a zawm dawn a, kum 2010 khan Aston Villa atangin Manchester City hi a pan.

Milner hian Leeds United atangin bul alo tan chho va, hemi hnu hian kum sarih chhung Newcastle United-ah khelin kum 2010 khan Manchester City-in £26m vel sengin an lei.

City-a a awm chhung hian Premier League-ah vawihnih an champion a, FA Cup nomawi pawh vawikhat an chawi.

Manchester City hian nikum nipui lai atang khan kum li daih contract ziahpui a kar khatah £165,000 hlawh turin an thlem reng a, mahse Milner hian a hnar a khelhna hmun chan theihna tur pan a duh.

Italian club Roma leh Arsenal pawhin English midfielder hi lakluh an duh tih thawm a awm a, mahse Merseyside club hian an chang ta hmel ber.

Milner bakah Liverpool hian Burnley striker Danny ings, Southampton defender Nathaniel Clyne, Inter Milan midfielder Kovacic leh Aston Villa striker Christian Benteke-te lakluh an tum niin tarlan a ni bawk.

Milner hian England national team tan game 53 khelin goal khat a khung tawh a, ram tan hian a game hmasa ber chu kum 2009 August thla khan Netherlands an hmachhawn tumin a khel.