Liverpool chuan nipui bazar inhawn hunah an midfielder thawm that an tum hle a, Chelsea midfielder Mason Mount chu an player lakluh tum ber a nih thu football.london chuan a tarlang.

Liverpool hian Borussia Dortmund midfielder Jude Bellingham chu lakluh tum viau thin mah se, Bellingham-a man hi a to dawn em avangin Reds hi an inhnukdawk tawh nia sawi a ni a, Mount-a lam an hawi ta zawk niin a lang.

Mount hian Chelsea-ah season khat dang bak contract a nei tawh lova, Chelsea hian contract ziahpui tum mek mah se inremna an la nei thei lo. Chelsea leh Mount te hi an inrem theih a rinawm loh viau tawh a, an inrem thei lo a nih chuan Chelsea hian kum 24 mi hi kumin nipuia hralh an tum nia tarlan a ni.

Mount-a manah Chelsea hian pound maktaduai 50 vel tal an phut a rinawm a, a man hi tlawm dawn lo mah se, Bellingam aiin a tlawm dawn chiang a, Dortmund hian Bellingham-a manah pound maktaduai 100 chuang an phut niin chanchinbu mite chuan an ziak.

Liverpool hian an midfield thawm that an mamawh hle a, Jordan Henderson leh James Milner te an upa chho tawh a, Naby Keita chuan season tawpah Anfield a chhuahsan dawn a, Alex Oxlade-Chamberlain pawh chhuak tura ngaih a ni. Fabinho leh Thiago te la awm mah se, Liverpool hian midfielder thar lakluh an mamawh a, Mount hi Jurgen Klopp chuan a duh hle nia sawi a ni.