Liverpool chuan Premier League lama an elpui Manchester City leh Chelsea te chu an lehpel a, Europe khawmualpuia football club hlu zinga pangana an ni.
Tun hnaia KPMG rich list an tih chhuahah hian La Liga club lian Real Madrid chu Europe khawmualpuia club hlu ber niin, an club hlutna hi £2.95 billion niin an chhut a, a hma aiin an hlutna chu 1.5% in a pung a ni.
List thar berah hian Manchester United chu pahnihna an ni a, Europe khawmualpuia club hlu ber dawttu hi an club hlutna chu £2.84 billion niin an chhut a, a hmaa an hlutna aiin 2% in a tlahniam a, heti chung hian pahnihna chu an la ni thei tho a ni.
Barcelona chu pathumnaah an chho a, a hmaa palinaa awm La Liga champion hlutna hi £2.71 billion niin an chhut a, hei hi a hma aiin 12.2% ngawtin a sang zawk a. A hmaa pathumnaa awm Bayern Munich chu palina niin, an club hlutna chu 0.4% in a pung a, £2.44 billion a ni.
Liverpool chu panganaah an awm a, a hma aiin dinhmun hnihin an kaisang a, an chunga awm thin pahnih Manchester City leh Chelsea te chu an khum tawh a. An club hlutna hi £2.26 billion niin, a ma aiin 19.3% ngawtin a pung tawh a ni.
Manchester City chu paruknaah an awm a, a hma aiin hmun khatin an tlahniam a, an club hlutna chu £2.21 billion niin, a hmaa an hlutna aiin 0.3% in an hniam zawk a. An hnuai chiahah hian pasarihna dinhmunah Chelsea an awm a, anni pawh a hma aiin hmun khatin an hniam a, an club hlutna chu £1.88 billion niin, a hmaa an hlutna aiin 6.3% zetin an hniam zawk a ni.
Tottenham Hotspur chu pariatnaah an awm a, a hma aiin hmun khatin an kaisang a, an club hlutna chu £1.75 billion niin, an club hlutna hi 15.8% laiin a pung a. A hma aia hmun hniha sang Paris Saint-Germain chu pakuanaah an awm a, an club hlutna chu £1.62 billion niin, a hmaa an hlutna aiin 36.7% ngawtin a san belh a ni.
Arsenal chu Top 10 huangah an awm pha chiah a, a hma aiin dinhmun hnihin an hniam tawh zawk a, an club hlutna chu £1.57 billion niin, an club hlutna hi a hma aiin 13.2% zetin a hniam tawh zawk a ni.
Top 20 huangah hian Premier League club 8 an lang phak a, Top 10 huanga paruk langte bakah West Ham United leh Leicester City te chu an lang ve bawk a ni.