Liverpool boss Brendan Rodgers chuan Manchester United-in ngawrh taka an rim mek Brazilian midfielder Roberto Firmino chu Old Trafford lam a hawi hmaa Anfield-a sawm luh a tum dawn thu Mirror chuan a tarlang lang.

Darkar 11 chhungin Liverpool hian Firmino hi ngawrh taka biak an tum nia tarlan a ni a, tunkar tir khan Firmino-a agent Roger Wittmann chuan Hoffenheim chhuansana England an pan dawn thu German chanchinbu Bild a hrilh. Mi tam zawk chuan United nen an inthlunzawm tawh niin an ngai a, hetih lai hian Brendan chuan Old Trafford a pan hmaa lo hijack a tum nia tarlan a ni.

Liverpool hian an midfielder rinrawl Captain Gerrard an chan tak avangin a thlakna an dap kual mek a, midfielder goal khung thei Firmino hi Brendan chuan a hmu tai hle nghe nghe a ni. Germany club Hoffenheim tan Firmino hian game 153 khelin season 5 chhungin goal 49 lai a khung ve hman a, tunah hian Brazil ram tan Copa America a khel mek a ni.

Nimin lam khan United chuan Firmino manah hian £13.1million an thehchhuak niin media te chuan an tarlang a, chanchinbu thenkhat chuan Hoffenheim leh United te hi Firmino manah an inrem tawh nia sawi te pawh an awm nawk. Chutih laiin Hoffenheim chuan Firmino manah £20m vel tal an chhiar thu leh United nen inremna an la neih loh thu an sawi bawk a ni.