Liverpool chuan Brighton midfielder Mac Allister chu an la lut fel ta a, kum 2028 July thla thleng Anfield-ah contract an ziahpui.

World Cup-a Argentina champion puitu Alexis Mac Allister  hian No. 10 a ha dawn a, a man erawh puanzar a la ni rih lo.

Thawhlehni khan Anfield-ah Mac Allister hian medical a nei a, India sanaa tlai dar 3:30 velah Liverpool chuan Argentine midfielder hi an player a nih thu an puang ta a ni.

"A ropui dangdai hle mai, ka suangtuahna a thleng dik a ni ber mai. Hemi hmun ka pan thei hi a hlu ka ti a, bul tan vat vat ka chak tawh a ni.

"Pre-season tanni atanga bul tan ve nghal ka duh dawn, ka team-mate turte hmuh vat vat ka ngakhlel hle. 

"World Cup-ah hun ropui tak ka tawng, Brighton tan tha takin ka khel bawk a. Tunah chuan Liverpool chiah ka rilruah a awm ta, player tha zawk nih tumin nitin ka bei ang.

"World Cup zawh hnu khan, trophy tam zawk hlawhchhuah ka chak thu ka lo sawi tawh a nih kha. Tunah chuan club lianah ka khel dawn ta a, trophy tam zawk hlawhchhuah theihna club ka pan e.

"He hmun ka lo thlen tirh hian, he club hi a ropui zia ka hre chiang chho, kan player te, staff te leh a thawktu zawng zawng te hi an danglam bik a ni. Liverpool tana khelh hlan ka ngakhlel tak zet a ni," tiin kum 24 mi Mac Allister chuan a sawi.