10 Aug 2019 02:56

bakteaJr.

Mizo tlangval

​Liverpool-in kaithar an lo sawp nghal

2019-20 Premier League season-a game hmasa ber khelh zawh a ni a, he inkhelah hian season hmasaa pahnihna Liverpool chuan Championship champion lai Norwich City chu 4-1 in an lo hneha, point thum an hlawhchhuak.

Liverpool tan hian Mohamed Salah, Virgil Van Dijk leh Divock Origi-te chuan goal khat theuh an khung bakah, Norwich captain Grant Hanley chu a own-goal bawka, Norwich lam atang hian Teemu Pukki chuan goal khat a khung ve bawk.

Liverpool 4-1 Norwich City

(Hanley 7’ OG, Salah 19’, Van Dijk 28’, Origi 42’) (Pukki 64’)

Player Ratings

LIVERPOOL: Alisson 6, Alexander-Arnold 7, Van Dijk 8, Gomez 6, Robertson 7, Henderson 7, Wijnaldum 7, Fabinho 8, Salah 8, Firmino 8, Origi 8. Subs: Adrian 6, Mane 6, Milner n/a.

NORWICH: Krul 7, Aarons 6, Godfrey 6, Hanley 5, Lewis 6, McLean 6, Trybull 6, Stiepermann 6, Cantwell 6, Buendia 7, Pukki 7. Subs: Leitner 7, Hernandez 6, Drmic n/a.

Match Report

Inkhel tan a ni a, beisei angin Liverpool in inkhel an thununa, inkhel tan atanga minute nga chuang hret khelh a nihin Robertson chuan veilamah ball a khalha, a hmaa awm Origi a pe, Origi hian box chhungah ball a chawk luta, goal hmazawn lamah ball a cross phei, Origi-a ball cross hi Norwich defender Hanley chuan an lamah ti lut palhin Liverpool hian si khat faiin hma an hruai phah.

Kaithar ni mahse Norwich hi an theuneu bik lova, an khel pawh a mawi. 15mins-ah chance tha tak an insiama, an si phurh an sut mai dawn emaw tih hnuah goal-ah an chan tir thei lova, hemi hnu lawkah Liverpool hian goal an khung zui leh nghala, goal khungtu hi Egyptian goal thun khawl Salah a ni.

20mins chuang hret khelh a ni a, Norwich lam hian Championship champion an nih zia ti langa, an in pass a mawi leh pek viua,a Pukki chu box chhung through ball tha tak pek ni mahse Pukki hian a pet goal lova, Alisson-a’n a save tha hle. Hemi hnu lawk hian Norwich hian goal khungna hun tha em em mai an nei leha, Stiepermann chu Liverpool box pawn deuh lawkah ball pek a ni, ani hian goal-ah tha em emin shoot mahse Alisson chuan a aia tha lo a lo save.

Darkar chanve vel khelh chhoh a ni a, Liverpool in chance tha em em mai an hlah ve; Henderson-a cross chu Firmino-a’n lo chest-in goal-ah volley mahse Norwich keeper Tim Krul chuan tha zetin a lo save. Half hnaih tawh lamah Liverpool hian an goal lina an khunga, Alexander-Arnold chuan Norwich box chhungah ball vawrh lutin, Origi chuan mawi takin a lo tauh lut.

Liverpool hian first half-ah si li lai thun mahse inkhel a hmuhnawm tho a tih theih a, Norwich tlar hma lam an hmuhnawm a, an tlarhnungin an thlawp zo lo hle a tih theih awm e. First half-ah hian Liverpool keeper Alisson chu a inhliama, lakchhuah niin, Liverpool keeper thar Adrien chuan a rawn thlak. First half hi 4-0 a tihtawp a ni.

Second half khelh a ni a, team hnihte khel hi first half aiin a dul hret a tih theih. Liverpool an hlauhawm zui renga, Salah pawhin chance tha tak tak nei mahse goal erawh an khung thei mai tawh bik lo. Liverpool hi first half ang pur pur an ni tawh lova, an defence a pawp teuh thin hle.

Darkar khat vel khelh a nihin bench atanga rawn lut hli Norwich midfielder Moritz Leitner chuan goal khung teuh viau mahse Adrien chuan tha takin a lo save a, hemi hnu deuh lawk hian kaithar Norwich chuan season liamtaa club tam zawk tih theih loh an ti a, Liverpool lakah goal an khung; Norwich tan goal khungtu hi Pukki a ni.

Hun tawp hnaih lam 80mins pelh hnuah, Norwich captain Hanley chuan an box paw deuh lawkah Firmino a ti tlu a, Liverpool lamin free-kick an hlawhchhuak; free-kick hi Alexander-Arnold chuan petin, a pet tha hle a, mahse Norwich keeper Krul chuan Alexander-Arnold ball pet kawh tak chu a lo dang. 90mins khelh a nih a, Norwich lam hian goal an khung teuh leh viaua mahse goal khung thei awm tawh lovin inkhel hi 4-1 in a tawp ta a ni.