Liverpool defender rinawm Virgil Van Dijk chuan champion lai Manchester City hmachhawn dawn mahse an hlauh loh thu a sawia, Liverpool chuan hlauh an hrelo hrim hrim tih a sawi tel bawk.

Liverpool hi tun Premier League season-ah an la tlawm lova, Old Trafford-ah point hnih an hloh tih loh chu point hlohna an la nei lo.

Liverpool hian champion lai City chu zanin dar 10 hian Anfield-ah an lo mikhual dawna, point 9-a City tlansan an duh chuan an chak ngei ngei a ngai.

Season hmasa khan Liverpool leh City-te chiah hi an inuma, a tawpah erawh City hi point khata champion-in Liverpool hi pahnihnaah an awm.

Van Dijk chuan, “Hmalam hun thui tak kan thlir hran lova, game 11 chiah kan la khela, City erawh team tha tak an ni. Season liamtaa kan inum pawh khan kan mangang lova, keimah bik phei hi chuan hlauh ka nei lo.

“Khelmual chhunga kan luh reng reng chuan hlauh kan nei tur a ni lova, Liverpool hian hlauh kan hre lo. Tun season-a kan chet tawh dan kan en hian eng game-ah pawh chak thei kan ni tih kan inhria. Kan tan chona lian tak a ni a, City hi champion lai an ni a, khawiah pawh player quality tha tak tak an kawl. Player an neih that mai bakah manager tha tak an nei a, hneh an harsa em em a ni,” a ti.