Liverpool chuan Hugo Ekitike chungchangah Eintrach Frankfurt an dawr leh ta a, Ekitike hi Newcastle United lam pawhin lak tumin hma an la ve mek bawk.

Kar tir lamah khan Newcastle United chuan Ekitike hi lak tumin hma an la a, €75million (£64.9m; $86.9m) lai thehchhuak mah se Frankfurt lamin an lo hnar.

Premier League Champions dawrna hi Frankfurt lam chuan engtin nge an lo chhan dawn tih a la hriat loh. Reds hian tun nipui bazarah hian £170m lai sum an hmang tawh a, Newcastle United striker Alexander Isak pawh an lak tum zingah a tel bawk.

Diogo Jota a awm tak lohah chuan Arne Slot hian hmatawng lak tur a dap ruai mai. Ekitike emaw Isak emaw, a tu emaw zawk zawk hi lak tumin hma an la ti a chiang a ni.

He hmatawng pahnih hi a tu emaw zawk zawk an la thei a nih chuan, tun nipui bazar inhawn laia Liverpool sum hman chuan £300m a kai thei dawn hial niin a lang.

Newcastle United chuan a vawi thum nan Ekitike dawr leh an tum a, an la thei a nih chuan, Isak chu Liverpool lam hian an lak theih a rinawm niin a lang mek bawk.

Newcastle United hian Ekitike an la thei lo a nih chuan, Isak hi an chhuahtir phal a rinawm loh bawk a ni. 

Tun nipui bazarah hian Liverpool hian Florian Wirtz chu British record fee-in an la lut a, Milos Kerkez leh Jeremie Frimpong pawh an la lut tawh bawk.

Premier League champion an nih avang khan pawisa fai £175m an dawng a, Adidas nen season khat chhung atan £60m laiin an inrem bawk. 

Heng an sum thawhchhuah hrang hrang atang hian transfer window-ah sum an hman tam theih phah a, tunah hian squad tha tak din thar tumin hma an la leh mek a ni.