Liverpool manager Jurgen Klopp chuan January thlaah Barcelona atangin Ousmane Dembele chu lei a duh a, Klopp hian Dembele manah hian £85 million vel zet sen a inhuam.

Jurgen Klopp chuan France winger Ousmane Dembele chu Premier League title lak an tumna kawnga hman tangkai a duh a, hei vang hian hmun dang a pan hmaa an club transfer record thar siam khawpa lei mai hi a duh a ni.

Camp Nou lama dinhmun chiang tawh lo tak, kum 21-a upa Dembele hi Klopp chuan Liverpool player man to ber ni turin a melh uluk viau a. Liverpool hian Dembele hi an lei a nih chuan £75 million a Virgil van Dijk an leina chu a khum chiang viau dawn a ni.

Barcelona boss Ernesto Valverde chuan Dembele hi Real Betis nen an inkhelh dawn pawh khan a teltir lo a, French winger hian pum lam fel lo avangin training pawh a zawm thei lo nia insawiin, Ernesto chuan Real Betis an mikhual tum hian squad-ah a telh loh phah a ni.

France coach Didier Deschamps pawhin Ousmane Dembele hi ram tana an inpuahchah thin lai pawhin engmah sawi lawk loin training naah a kal tlai fo niin a sawi a. Mahse, Dembele agent Moussa Sissoko ve thung chuan Borussia Dortmund player hlui hi a chhan hle a, Camp Nou chhuahsan a la duh loh thu thlengin a sawi a ni.

Klopp chuan Barcelona in season hmasa tan dawna Bundesliga atanga £135.5 million zeta an lei Dembele hi tlawm deuh zawka lei theih dan ngaihtuah a tum mek a. Tun season-ah pawh Dembele hian bul a tan tha thawkhat a, goal 6 a thun tawh bakah mi goal thun tur vawi 2 a siamsak tawh bawk a. Inthununna kawngah a buaithlak em avangin a dinhmun a fuh loh phah a ni.

Kum hnih kalta khan French club Rennes ah a khel a, a chet that theih em avangin European club lian te chuan an hmutai hlawm hle a. Borussia Dortmund lamah a kal a, heta tang hian Barcelona lam a pan ve leh a ni.

May thlaa Barcelona leh Real Madrid ten El Clasico an khelh tum khan Dembele hi substitute bench-ah a awm a, hemi tum atang hian Jurgen Klopp chuan Barca winger hi a ngaihven chho niin a sawi.

Liverpool sporting director Michael Edwards chuan a hmatawng sir lama tlan tur hi a duh thu a lo sawi tawh a, Klopp chuan Dembele hi tha bera a rin thu a sawi a. Manchester City lehpel thei tura team chu tihchak belh zel a duh thu a sawi a ni.