Inrinni tlai Premier League inkhelah champion lai Manchester City chuan Liverpool an lo mikhuala, mual neitu lam hian 4-1 in hnehna pawimawh tak an chang.
Etihad-ah hian Liverpool-in Mohamed Salah goal hmangin hma an hruai hmasa a, mahse City hian goal li in an chhang leta, City tan hian Julian Alvarez, Kevin de Bruyne, Ilkay Gundogan leh Jack Grealish te chuan goal khat theuh an thun.
City hian khelh 28 atangin point 64 an hlawhchhuak tawha, pahnihnaah awm zelin, point 8 in league hmahruaitu Arsenal an pha lova, Arsenal hi City aiin khelh khatin an khel tam zawk. Liverpool hi pasarihnaah an awm a, khelh 27 atangin point 42 an hlawhchhuak tawh a ni.
City hian inkhel bul an tan tha a, chance pawh tha tak tak an nei a, mahse Riyad Mahrez-a free kick chuan goal a zawn lo hreta, Rodri-a chance tha Liverpool goalkeeper Alisson Becker chuan a save sak bawk. Liverpool hian minute sawmhnih an khelh tlin hma hretin goal an thuna, Trent Alexander-Arnold chuan Diogo Jota chu through ball tha tak pein, Jota hian City goal lama a khalh phei hnuah Salah a pe a, Salah hian goal-ah a chantir a, Liverpool hian an shot on target neih hmasak berah goal an thun nghal.
Liverpool hian minute sawm bak hma an hruai lova, veilam atanga Grealish-a cross chu Argentine striker Alvarez chuan goal-ah lo pet luta, City si phurh a rula, 1-1 a ni. 1-1 hian first half tawp mah se, second half an tan hnu lawkah City in hma an hruai nghala, mual dinglamah Mahrez chu ball tha tak pek a ni a, Mahrez hian goal hmazawnah ball pe thla in De Bruyne chuan goal ah a lo khunga, 47mins-ah City in an goal hnihna hi an thun.
Second half a minute sawm an khelh hmain City in goal dang an thun leh a, Liverpool box pawna ball an inpek kual hnuah, Mahrez chuan dinglam atangin box ah ball a laluta, Alvarez pe in, Alvarez-a shot chu Alexander-Arnold chuan lo block sak mah se, Gundogan chuan goal-ah a pet lut chhunzawm ta tho a, 3-1 in City in hma an hruai.
74mins-ah City in an goal ngana an thuna, Grealish chu mual veilamah a kangin ball tha tak pek a ni a, box a tlan lut tur De Bruyne a pe. Grealish hi box chhungah a inpawt lut ve nghala, box chhung veilam atangin De Bruyne chuan ball rawn pe in, goal-ah a lo khung. Grealish hi a khel tha hle a, City player zinga khel tha ber tih theih niin, goal a khung hi a phu hle.
City in inkhel an thunun tluana, Liverpool hian an ngam lo hle. 80mins hnuah Grealish hian chance nei leh mah se, a shot chu Alisson-a’n a save sak a, goal luh belh tawh lovin, 4-1 in inkhel tihtawp a ni a, City hian point 3 hlu tak an hlawhchhuak ta a ni.
