06 Dec 2018 10:51

inkhel

​Liverpool-in Burnley an lehthal

Premier League inkhelah Liverpool chuan Turf Moor-ah Burnley an tlawha, Burnley hian hma hruai hmasa zet mahse, Liverpool-in goal thumin an chhang leta, Liverpool hi khual mualah 3-1 in an chaka, season kal mekah tlawm an la nei lo tluang zel.

Goal lutte hi second half-a lut vek an ni a, Burnley tan Jack Cork chuan goal a khunga, Liverpool chuan James Milner, Roberto Firmino leh Xherdan Shaqiri-te goal hmang Cork-a goal thun hi an chhanglet.

Khelh 15-ah Liverpool hian point 39 hlawhchhuak tawhin, pahnihnaah an awm chhunzawm zela, point hnihin hmahruaitu Manchester City an pha lo. Burnley hian khelh 15-ah point 9 chiah la hlawhchhuakin 19-naah an awma, an hnuai chiaha awm Fulham leh an chung chiahah awm Southampton-te nen an point hlawhhchhuah tawh zat a inang chiah.

Inkhel a tam chho hle a, manager ten player an hmang kual lo thei lo. Burnley lakah pawh Liverpool manager Jurgen Klopp chuan a hmatawng chhuanvawr pathum Mohamed Salah, Roberto Firmino leh Sadio Mane-te inkhel bul a tan tir lo veka, Firmino leh Salah erawh second half-ah dahluh an ni.

Second half tan atanga minute sawm khelh hma deuhin Burnley-in corner an hmu a, ball vawrh luh niin, Liverpoll goal hmaah Burnley player an tam angreng hle a, Liverpool goalkeeper Alisson Becker chuan ball man thei lawk lovin, buai deuh nak nak karah Cork hian goal-ah a chhuih luta, 54mins-ah Burnley chuan hma hruaiin, tun season-ah Burnley leh Chelsea bak chu Liverpool lakah hma hruai thei an la awm lo.

Burnley-in goal an thun atanga minute sawm pawh a ral hmain Liverpool-in an chhanglet nghala, mual veilam atangin box chhugah ball khalh luh niin, ball chu Divock Origi pek a ni a, Origi hian box pawn chiaha awm Milner pe ve lehin, Milner hian box pawn atangin lei hrulah a peta, goal-ah a lut. 68mins-ah Liverpool hian free kick hmuin, Burnley box chhungah ball vawrh luh a ni a, Virgil Van Dijk chuan lo changin goal hmazawnah ball hi a pe phei nghala, hnai tak atangin Firmino chuan awlsam takin a lo tlawh luta, 69mins-ah Reds-in Burnley lehthalin, hma an hruai.

2-1 hian Liverpool an chak mai tura ngaih a ni tawh a, mahse Klopp-a nauten an la duhtawk lo. Mual dinglamah Salah chu tha tak ball pek a ni a, ani hian a ke vei lamin box chhunga tlan lut Shaqiri pe chho ve nghalin, Shaqiri hian ‘cool’ takin goal-ah a lo thun a, hemi hnu lawk hian inkhel tihtawp zui a ni.

PLAYER RATINGS

Burnley: Hart 7, Bardsley 7, Tarkowski 7, Mee 7, Taylor 7, Gudmundsson 7, Cork 7, Westwood 7, Brady 7, Barnes 7, Wood 7. Subs: Heaton, Lowton, Vokes 6, Hendrick, Lennon6, Vydra 5, Long.

Liverpool: Alisson 8, Gomez 6, Van Dijk 7, Matip 7, Moreno 7, Henderson 7, Milner 8, Keita 7, Shaqiri 7, Sturridge 7, Origi 7. Subs: Mignolet, Fabinho, Firmino 8, Salah 7, Lallana, Camacho, Alexander-Arnold 7.