Liverpool chuan Inrinni zan khan Premier League inkhelah Brentford an mikhual a, Mohamed Salah goal khat hmangin Liverpool hian Anfield-ah Brentford hi an lo hneh.

Khelh 35 atangin Liverpool hian point 62 an hlawhchhuak tawh a, panganaah awm mekin, khelh thum bak khelh tur an nei tawh lo. Brentford hian khelh 35 ah point 50 neiin, pakuanaah an awm ve mek a ni.

Liverpool hi beisei angin tun season-ah che tha lo mah se, season tawp lamah erawh an rawn insangmar hle a, tunah hian Premier League-ah a zawnin game ruk an chak tawh a, top 4-a awm tumin an bei mek. Palinaa awm Manchester United chu point 1 chiahin an pha tawh lova, mahse United hi Liverpool aiin khelh hnihin an la khel tlem thung.

He inkhela goal awmchhun hi 13mins-a lut a ni a, Brentford box chhunga Fabinho-a’n ball a dah luh chu far post lama awm Virgin van Dijk chuan lo tauhin, goal lama rawn tlan lut Salah chuan goal-ah a khung chhunzawm a, Liverpool chakna goal khungin, hei hi Anfield-a Salah goal 100 khungna chiah a ni.

Darkar chanve an khelh tlin hma hretin Liverpool in chance tha tak an nei leh a, Trent Alexander-Arnold chuan midfield atangin box chhungah ball tha tak a vawrh lut a, Darwin Nunez chuan goal a pet luh tum mah se goal zawnah a pet thei lo.

40mins-ah Brentford lam hian goal ah ball khungin, an si phurh an rul emaw an ti zet a, mahse offside avanga pawm a ni lo. Second half tir lamah Liverpool in goal an khung belh teuh hle a, box chhung dinglam atangin Diogo Jota chuan na takin ball a cross a, Cody Gakpo pet per mahse goal-ah ball a lut lo.

80mins an khelh tlin hma deuhin, Alexander-Arnold chuan box pawn atangin goal ah ball a shoot a, shoot chhe lo viau mah se, Brentford shot stopper David Raya chuan a lo save. A tir minute sawm chuang hreta Salah goal thun bak goal a luh belh tawh lova, 1-0 hian inkhel tawpin, Liverpool in hnehna pawimawh tak an chang ta a ni.