Premier League club Liverpool chuan coronavirus avanga season a khailak nasat em avangin an staff-te chu an chawlh tir riha, anni hi an hlawh pe vek lovin, sawrkar lam an ring.

Liverpool-in an staff an chawlh tir te hian an hlawh chu 100% hmu mahse, sawrkar scheme chikhat atangin an hlawh 80% hi an la riha, Liverpool chuan 20% tum ve lehin, Liverpool hmalak dan hian dem a hlawh hle.

Liverpool hi club rethei an ni hauh lova, Premier League club lian ber zinga mi niin, season kal mekah pawh an che tha fal hle a, champion ngei tura ngaih an nih laiin, an staff te hlawh pe turin sawrkar an ring mai chu mi tam takin an dem.

Liverpool player hlui Jamie Carragher ngei pawhin hemi chungchangah hian Liverpool a dem hle a, social media lamah Liverpool hmalak dan chu a zahpuiawm thu a sawi chhuak nghe nghe.

COVID-19 avangin season a khailak nasa em em a, club tinte chuan sum lamah harsatan an tawk meka, an player hlawh te pawh an tihniam mek. Liverpool hma hian Newcastle, Tottenham, Bournemouth leh Norwich te pawhin Liverpool tih dan ang hian an staff-te chu an lo chawlh tir tawh a ni.