Liverpool right-back Kum 22 a upa Trent Alexander-Arnold chuan kum 2025 thleng daih contract thar Liverpool-ah a ziak.

Game  179 lai Liverpool tana khel tawh Arnold hi Liverpool Academy chhulchhuak niin League Cup a Tottenham October 2016 a an hmachhawn tum khan a vawikhatna atan Liverpool tan a inlan tan a, Premier League, Champions League, FIFA Club World Cup leh UEFA SUper Cup chawimawhna an dawn theihna tur atana Liverpool player pawimawhber te zing ami a ni.

Contract thar chungchang a ziak chungchangah hian Arnold chuan football a khelh tan tirh atanga a club khelhna awmchhun Liverpool tan contract thar a ziak leh thei chu amah leh a chhungte tan pawh a thu lawmawm tak a ni thu a sawi.

Inhliam avanga Euro 2020 khel ve thei ta lo Alexander-Arnold hi season thara dam tha taka inkhel chho leh thei turin tunah hian Austria a Liverpool pre-season training na hmunah a awm mek a ni.

English fullback Alexander-Arnold chuan contract thar a ziah chungchang sawiin, “Heti ang hun tha pek ka nih avang hian kan lawm em em a, contract thar ziak tur hian ka inngaihtuah buai lo. Club dinhmun a tha a, ka vanglai tak ka thleng chho dawn mek bawka, engkim hi a kaltluang mek.

“Ka contract ka pawt seia, hun rei zawk he hmunah ka awm thei dawna, chu chu ka tan a tha hle a ni. He club bak hi han hriat chian tak tak ka nei lova, hun eng emaw chen ka awm tawh hnuah ka la awm zel tur hi kei leh kan chhungkaw tan chuan thil lawmawm tak a ni,” a ti.