Liverpool defender hlui, tuna Sky Sports pundit ni mek Jamie Carragher chuan Liverpool-in world class player paruk an neih thu a sawia, an zingah hian Mohamed Salah chuan a phu ang tawk fakna a dawn ngai loh thu a sawi bawk.

Tun season-a Liverpool that zia chu kan hre veka, March thla hian Premier League-ah an champion fel tawh a rinawm. Liverpool hian season kal mekah league-a tlawm an la nei lova, vawi khat an tumpui an inhnehtawkpui tih loh chu an la chak vek.

Liverpool hian player pawimawh tak tak an neia, chung zingah chuan an goalkeeper Alisson Becker, Trent Alexander-Arnold, Virgil Van Dijk, Salah, Sadio Mane leh Roberto Firmino-te chu world class player an nih thu Carragher hian a sawi.

Carragher chuan, “Pawn lam atanga thlir tu te chuan Mo Salah hi world class player-ah an ngai vekin ka ringa, mahse Liverpool fan-te hi chuan a phu ang tawkin an fak lovin ka hria. A season khatnaah khan a che tha em a, chuvang chuan a season hmasa ber atanga kan teh chuan a tlahniam teh meuh mai.

“Mahse Salah hian season khatah goal 47 hi a khung leh tawh dawn reng reng lo. Liverpool tantu thenkhat ka kawmnaah te leh social media lama a lan danin Liverpool tantute hian Salah hi a phu ang tawk fakna an pe lovin ka hria a, a thatna hi an hmu tawk lo bawkin ka hria.

“Liverpool hian world class player paruk an neia, ka hmuh dan chuan an goalkeeper bakah, Alexander-Arnold, Van Dijk, Mane, Firmino leh Salah-te hi an ni. Salah tih loh player dang pang te hi eng anga to pawhin Liverpool supporter-te hian hralh an duh ka ring lova, engti kawng mahin Alisson leh Van Dijk pawh hi hralh an duh dawn lo, mahse Salah hi pound maktaduai 130-a dawrtu awm ta se an hralh duh mai ka ring,” a ti.