14 May 2019 09:49

inkhel

Liverpool hian trophy lak kan phu: Milner

Tun season chhungin Liverpool chu che tha viau mahse Premier League title an la thei ta lo a, James Milner chuan an chet that dan ngaihtuah chuan trophy lak ngei an phu niin a sawi.

Jurgen Klopp leh a pawlte chuan Premier League point 97 zet mai an hmu a, heti chung hian title an la thei ta chuang lo a, Manchester City aiin an hniam ta chiah a, kum 29 chhung an lo nghahfak tawh chu a thleng thei ta lo.

Premier League title la thei ta lo mahse Liverpool tan trophy lak theihna hun tha a la awm mek a, June 1 hian Madrid khawpuiah Tottenham Hotspur nen UEFA Champions League final-ah an inkhel dawn a ni.

Manchester City vawi hnih ngawt Premier League title a lakpui hnua 2015 a Liverpool zawmtu James Milner chuan an chet that dan ngaihtuahin Liverpool chuan tun season-ah trophy lak ngei an phu nia a hriat thu a sawi chhuak.

James Milner chuan, “Season tan dawnah vawi 38 inkhelha vawi 30 chak theih phawt chuan kan champion loh reng kan ring dawn lo a. Tun season chhungin kan che tha em em mai a; amaherawhchu, keini aiin Manchester City an lo che tha zawk sia, a hrilhhaithlak duh hle,” a ti.

“Kan tum angin awm ta lo mah ila kan thlen chinah theihtawp kan chhuah a, dinhmun sang taka kan din theih tho avangin a zahpuiawm chuang lo hle a. Kan chet that viau ruala title kan la thei ta lo chiah hi chu a vanduaithlak tak meuh a. Hmabak kan la nei a, chutah chuan kan tum ram kan thlen theih tak loh thawi damna chu kan la hmu thei dawn a ni,” a ti bawk.

A sawi zelnaah, “Barcelona laka kan chet theih dan ngaihtuah khan beiseina neih san loh theih a ni lo a. Pathianniah pawh theihtawp chhuahin kan khel a, result tha tak kan nei leh thei a. Champions League final khelh hunah phei chuan a hma zawng aia tan lehzual a ngai hle dawn a ni,” a ti.

Milner chuan, “Min tantute kha kum tluanin an fakawm hle a. Tihphur kan ngaih changin min tiphur a, kan tlakhniam changin min fuihtuah an tang a, hun harsa deuh paltlang a ngaih pawhin min thawp nasa zual zel thin a. Hetiang boruak kan neih chhoh zel avang te pawh hian player te mai ni loin, min tantute pawh hian trophy lak hi an phu ve bawkin ka hria,” tiin a sawi.