Jamie Carragher chuan Liverpool-in player lar an lei ngai lo tih sawiin, an player neihte chu lar turin an chher chhuak thin tih a sawi.

Liverpool chu tun season-ah an kal tluang hle a, Premier League title la tura beiseiawm ber an ni mek a. Inrinniah khan Tottenham chu Roberto Firmino goal thun hmangin 1-0 in an hneh a, game 21 khelhah vawi 20 an chak chiah a ni.

Jurgen Klopp leh a pawlte chuan chanchin duhawm tak an nei chho zel a, record pawh an siam chho nual bawk a. Europe khawmualpuia league sang zual pangaa club bul tan tha ber an ni mek a ni.

Reds star hlui Jamie Carragher chuan, “Liverpool hian player tha tak tak an lei vanga hetiang dinhmuna ding thei hi an ni hran lo a. Player an lei turte hi ngun takin an zir chiang hmasa a, an theihna te an hriat chian hnuah an lei chauh thin a. Hetianga player an lei, lar lem lote hi an chher hriam a, player lar takah an chhuah thin,” a ti.

“Robertson chu Hull atangin an lei a, Wijnaldum pawh Newcastle United atanga an lei niin, Salah hi Chelsea player a ni thin a, Mane pawh Premier League huang chhunga awm tawh thin a ni,” a ti bawk.

A sawi zelnaah, “Heng player ka sawi lante hi khawvela club lian ber bera khel an ni lo a, player lar leh langsar an ni ngai lo bawk a. Player chu duh duh lei theih a ni a, lei mai pawh a harsa lo hle a, a pawimawh lai ber chu engtin nge an player leite hi an enkawl zui tih hi a ni,” a ti.

“Club-in player an lei a nih chuan hma an sawn theihna turin an enkawl tur a ni a, hetiang kawngah hian Jurgen Klopp hian fak a hlawh lo hle niin ka hria a. Liverpool hian superstar an lei ngai lo a, hetiang ni thei tur hian an player te hi an chher chhuak zawk thin a ni,” tiin Carragher chuan a sawi.

UEFA Champions League title an lak bakah UEFA Super Cup leh Club World Cup title te an la zui a, hei vang hian Liverpool chu England ram chhung mai ni lo, khawvela club hrang hrang zinga a tha ber pawla ngaih an ni chho mek a ni.