Machester United captain hlui Wayne Rooney chuan Manchester United hmelma lian ber Liverpool te chu Premier League season kal mekah hian champion an phu thu a sawi.

Liverpool hi season kal mekah an che tha fal hle a, point 25 laia hma hruaiin champion turin khelh kuaah vawi hnih bak an chak a ngai tawh lova, mahse kan hriat theuh angin coronavirus avangin season a khailak mek.

Tunah hian Premier League hi coronavirus avangin April thla ni 30 thleng an suspend meka, theih anga hmaa season chhunzawm tum ni mahse eng mah sawi lawk theih a awm lova, tum loh deuhin season hi tihtawp a ni mai lovang tih pawh sawi theih a ni hauh lo.

Liverpool hian Premier League season kal mekah khelh 29 khel tawhin point 82 lai an hlawhchhuak tawha, tun thlengin league-ah vawi khat chiah an la tlawma, vawi khat an tumpui an inhnehtawkpui bawk tih loh chu an la chak fai vek.

Liverpool hi champion tluk ni hman mahse season a khailak chho a, kum 30 hnuah Premier League title an la ta nge nge dawna a lan laiin, coronavirus avangin tum angin an awm thei rih lo.

Manchester United tana goal khung hnem ber Rooney chuan, “Liverpool hian Premier League title an la dawna; Everton fan-te hian a chang chuan phone-ah min bia in season chu cancel a nih tur thu te an rawn sawi thin. Everton mi ka ni a, chubakah Manchester United tan kum 13 chhung ka khel bawk nen season chu cancel mai se tihna rilru a lo awm ve fo.

“Mahse season hi cancel lo se ka ti a, Liverpool hi an tha em em a, an thawkrim bawka, title lak hi an phu takzet. Season an titawp lo hi thutlukna dik tak a ni a, Liverpool tan pawh kum 30 an nghak tawha, lak bo sak chi an ni lo.

“Season tihtawp a ni lo hi rawn kaithar tur leh tla tur te tan pawh a dik thlapin ka hria a, chubakah Champions League spot luah tur te tan pawh a tha. Heng dinhmun hrang hrang hi a kaihhnawih club te tan a pawimawh em avangin season hi tihtawp ni ta ang sela an inkhin sup sup ka ring.

“A dik dan ber chu 2019-20 season khelh zawh hi a ni a, he season khelh zawh nan season thar kan chan zawk a nih pawhin a pawi lo. Kumin kum tawp thleng hian tun season khelh zawh nan hun hmang mah ila mak ka ti dawn hauh lova, football pawh hi thil dang ang bawkin a tul dan ang angin inven thiam a ngai ve bawk. Keichuan entu mipui awm lova season khelh zawh hi ka thlawp lo bawk a ni,” a ti.