Graeme Souness chuan Liverpool chu team tha chungchuang an nih thu sawiin, tun season-ah phei chuan that lohna nei lo ang hialin a sawi.
Liverpool player hlui leh manager hlui ni bawk Graeme Souness chuan tuna Reds team chu tha a tih thu a sawi uar hle a. Jurgen Klopp hnuaiah nasa taka hma an sawn thu sawiin, Brendan Rodgers aiawhtu chuan kawng hrang hrangah hmasawnna a siam hnem tawh hle niin a sawi a ni.
An club intuaitharna kawngah fuh lo lai chu a awm ve fo a, goalkeeper duhthusam lo te, defence phui tha tawk lo te chuan tihbuai lai a nei a. Sum tam tak sengin an fel lohna lai hi an thawm tha teuh tawh a, tunah chuan Premier League title beisei thei khawpa tha an ni chho tawh niin Souness hian a sawi chhuak.
Souness chuan Pathiannia Liverpool-in 2-0 a Cardiff an hneh hnu khan, “Champion ni thei tur chuan a kalkawnga harsatna chi hrang hrang awmte chu pal tlang vek a ngai a. Tuna Liverpool team te hi chu team puitling tak, duh tawka hrual tawh hnu, nawh tlet vek tawh an ni berin ka hria,” a ti.
“An dawhthei em em a, point thum hmu thei turin an pawngpaw chet buan buan lo a, hun tha an nghak chhuak hram hram zel a. Khelmualah an che vel a dikin, hmuh pawh an nuam hle a, hetiang taka puitling hian an awm chhoh zel pawh a rinawm,” a ti bawk.
A sawi zelnaah, “Duhthu an sam famkim bik lo chiang a, that tawk lohna lai chu an la nei teuh a. Heti chung hian team ropui tak mai an la ni tho tho a, puitlin kawngah hma an sawn nasat zia hi a lang chiang hle a. Ka sawi tawh angin duh ang taka nawh tlet tawh hi an ni ber mai,” a ti.
“Team tha tak mai nih a, player tha tak tak neih teuh phei chuan hmun khat atang chauh ni loin, hmun hran hran atangin chona hi a rawn lawr tuam tuam zel a. Mahse, hetiang hian chona rawn awm teuh mahse, player te chuan rilru fim tak puin an hmachhawn zel ang a, goal chhuah loh an tum ang a, lehlam goal-ah a tam thei ang ber thun an tum mai dawn a ni,” tiin Souness chuan a sawi.
“Chet fuh loh riau ni te pawh an nei ve thin a, Spurs lakah pawh khan chutiang hun chu a inher chhuak chiah a. Tin, a hma pawhin vawi eng emaw zat chu han tih fuh loh deuh chang chu an nei bawk a. Khatiang zia kha chu tunah chuan an thlauh thla tawh a, mahni inrintawkna tha zawk nen khelmualah an che tawh a ni,” a ti bawk.
Graeme Souness chuan, “Liverpool hi team tha em em mai, chak lohna lai nei miah lo an ni a. Hetiang zel an nih chhoh chuan title pawh an la nual thei ngei ngeiin ka ring tlat a ni,” a ti.