Manchester City manager Pep Guardiola chuan Sunday zan Premier League inkhela an tum tur Liverpool chu khawvela team tha ber an nih thu a sawi.

Liverpool hi Premier League hmahruai mektu an ni a, tun season-a league-a la tlawm lo awmchhun niin, Manchester United an inhnehtawkpui tih loh chu an la chak fai veka, khelh 11-ah point 31 lai an hlawhchhuak tawh.

Liverpool hnuai chiahah City hi an awma, anni pahnih hi season hmasaa inum awmchhun an ni a, tun season-ah pawh inum ber an ni leh mek. Sunday zan dar 10-ah City hian Liverpool chu Anfield-ah an luhkhung dawna, hei hi season chawhma lama inkhel pawimawh ber a tih theih hial awm e.

Pep Guardiola chuan Champions League champion ni mek lai Liverpool fakin, “Manager ka nihna angin season hmasaa kan champion khan Liverpool chu champion kan nih theihna tura ka elpui tawh zawng zawnga tha ber an nih thu ka lo sawi tawh.

"Club ang pawhin kan hlawhtlin ber tum emaw kan hlawhtlin ber zinga pakhat a ni a, tunah hi chuan Liverpool hi khawvela team tha ber an ni hial awm e. Team tha em em mai an ni a, an history atang pawhin chu chu a lang.

“Anfield boruak kan hre veka, mahse chu lam ai mah chuan team anga an tih theih lam hi ka thlir a, player an neih that zia leh manager tha tak an neih zia te hi ka en zawk. Tunah hian Anfield-a khelh hi a harsa em em a, Europe-ah Anfield aia khelh a harsatna ka hre lo,” a ti.

Liverpool hi a zawnin league-ah game 45 chhung Anfield-ah an tlawm tawh lova, City hian hei hi thiah an tum dawna, game pawimawh em em a ni bawk nen inkhel a hmuhnawm hle tura ngaih a ni. Liverpool hi an chak a nih chuan point 9 laiin hma an hruai tawh dawna, City an chak erawh chuan an inkarah point thum chiah a awm tawh dawn a ni.