Kylian Mbappe chuan Liverpool leh an manager Jurgen Klopp te chu fakin, Reds chu khawl ang mai an nih thu a sawi.

Season kal mekah Liverpool chuan Premier League-ah hma an hruai a, anmahni hnaih bertu, league champion ni mek Manchester City aiin point 25 ngawtin an sang tawh zawk a ni.

Nikum June thlaah khan Liverpool chuan Tottenham Hotspur hnehin UEFA Champions League title an la a, Premier League lamah chuan season liam taah khan Manchester City chu point 1 in an pha ta lo a, pahnihna an ni a. January 2019 atang khan league bikah hneh loh an nei lo chho a, kumin February thlaah Watford lakah an tlawm ta a ni.

Paris Saint-Germain star Kylian Mbappe chu tun hnaiah Liverpool nen an sawi zawm chho a, chutih rualin coronavirus vangin club hrang hrang sum dinhmun a tlahniam a, hei vang hian French forward pawh hian Anfield a pan theih a rinawm lo hle.

Hetiang thu thang chungchangah hian Liverpool boss Jurgen Klopp chu a ngaihdan an zawt a, German coach chuan, “Player ka neih saah hian ka lung a awi tawk viau rih a. Chutih rualin hma sawn belh thei tur chuan tlema player man to deuh lei theih chu a tha ka ti,” tiin a sawi a ni.

Mbappe chuan, “Tun season chhung hian Premier League bikah Liverpool chu an che tha khawp mai a, khawl ang mai an ni,” a ti.

“An inkhel han en reng reng hian engkim mai hi an tan chuan a awlsam hmel a, chak te hi a harsat loh hmel bik riau zel a. Hetiang taka khelmuala chet that theih hi chuti maia awm zen zen thei a ni lo,” a ti bawk.

A sawi zelnaah, “Hetianga an chet that theih chhan hi chu lang lo lama an inbuatsaih nasat vang tih a chiang reng a. Tha taka inpuahchah hmasak loh chuan a chet that reng theih loh a, thawhrimna leh taimakna a pawimawh,” a ti.