​Liverpool hi an nih tur ang an la ni lo – Souness

03rd December 2018, 02:12PM

Liverpool player hlui leh manager hlui ni bawk Graeme Souness chuan Liverpool chu an that tur anga an la that tawk loh thu a sawi.

Merseyside derby inkhelah Liverpool chu team lian zawk ni mahse point khat chauh an hlawhchhuak teuh hle a, mahse hun tawpah an vannei. 90mins zawh hnuah minute li pek belh a ni a, Liverpool hian 90+6mins-ah goal an khunga, goal khungtu hi Divock Origi niin, hnehna an chang zui.

Liverpool captain hlui Souness chuan, “Liverpool hi Premier League-ah an khel tha thawkhat viaua, mahse an nih tur ang erawh an la ni lo. An buaina tam zawk hi chuan an midfield atanga lokal hi a niin ka hre bawk. Tun nipui kha kan thlir let chuan Jurgen Klopp khan midfielder pahnih a lalut a, mahse pakhat dang; Nabil Fekir chu Lyon atanga lakluh a duh. Fabinho leh Naby Keita-te hi Liverpool midfielder neihsa te ai hian an tha zawk em tih chu zawhna awm a ni.

“Nikum khan midfield-ah Liverpool hian James Milner, Georginio Wijnaldum leh Jordan Henderson-te an hmanga,lehlam kha ball an chhuhsak zung zunga hmalamah an hmatawng player pathumte kha ball an pe nghal zung zung thin a, an hlauhawm thin hle a nih kha. Tunah erawh nikum aiin an muang tawh a, a tul lova ball khawih emaw in pass kual an nei tawh.

“An hmatawng player pathumte hnenah hian a theih anga ranga ball an pek zung zung a ngai a, chu chu an ti thei a nih chuan an nih tur ang an ni chho ang. Mahse tunah hi chuan nikum an tluk lo hle in ka hria,” a ti.

Liverpool player hlui dang Jamie Redknapp pawhin Liverpool forward Roberto Firmino chuan hun harsa tak a paltlang thu sawiin , Redknapp chuan, “Klopp khan a naute khelhdan kha a fak na in eng a ni lo. Nikum khan an khel ka en fova, a bikin Anfield-a an khel ka en tama, an hmuhnawm thin hle. Tunah hian Firmino hian hun harsa tak a paltlang mek tih chu hai rual a ni lo. Player tha tak a nih avangin he hun harsa hi a paltlang ngei ang mahse tunah chuan rih chuan nikuma a khelh dan nen a inang lo hle a ni,” a ti.

Copyright © inkhel.com 2024. All rights reserved.