EA Sports chuan FIFA 19 ah Liverpool striker Mohamed Salah rating chu 88 in an dah a, hei vang hian Liverpool tantute chu an thinrim a, FIFA 19 an tihtauhsan mek.

Season hmasa lamah Egypt superstar hi a che tha hle a, hei vang hian Liverpool tantute chuan a hniam berah Salah rating hi 90 vel tal ni tura an ngaih thu an sawi a. Kum tina an lo tih dan angin EA Sports chuan FIFA 19 an tlangzarh hmain September thlaah rating thar hi an tidarh leh a. Kum dangah pawh rating chungchangah hian inhnialna a chhuak deuh zel a, kuminah pawh a chhuak leh ta chiah reng a ni.

Nikum khan Lionel Messi ngaisangtute chu an lo thinrim tawh bawk a, Messi rating hi Cristiano Ronaldo rating aiin point khatin a hniam zawk a, hei vang hian Messi duhtute chuan an pawm dam thei lo a ni.

Mohamed Salah hi season liam taah khan goal thun hnem berte zingah a awm a, Premier League ringawtah pawh goal 32 ngawt a thun thei a. Liverpool chu UEFA Champions League final a luhpui a, Europe khawmualpuia inelna sang berah hian goal 10 ngawt a thun nghe nghe a. Hei mai hi a la ni lo a, PFA Player of the Season, FWA Football of the Year leh Premier League Player of the Season atan te an thlang bawk a ni.

FIFA 18 ah khan Salah rating hi 83 a ni a, point 5 ngawtin hma a sawn tihna a ni a. Game thar ber turah hian Egyptian superstar hi player that dan indawtah 27-na a ni a, hei hi fans lam chuan an helh hle a. A tlan chak zawngah point 92 an pe a, dribbling lamah chuan point 89 a hmu thung a ni.

A tlangpuiin FIFA hian rating an pek san deuh ho chu season khat chauh ni loin season eng emaw zat an che tha hlawm a. Hun rei tak lo che tha chho tawhte chu rating point 90 aia sang an pe tlangpui a. Messi chu rating point 93 an pe a, heti a nih chuan Salah tan 88 chu a awm viau niin a ngaih theih a ni.